政情：盼同年輕人拉近距離 百仁基金想搞電競
培育年輕人係唔少慈善團體嘅目標，百仁基金尋日舉行傳媒午宴，未來一年除咗想多啲關顧基層外，亦希望可以多拉近同年輕人嘅距離，搞多啲活動，主席陳寧寧就話依家好多年輕人都對電競好有興趣，來年可以諗下搞電競，甚至組一隊香港百仁隊，分埋專業隊同業餘隊添。
三個副主席邱詠麒（Josephine）、羅詠詩（Anthea）同嚴偉賢（Juanna）都有出席午宴，Josephine來年要幫百仁基金搞大型論壇，而Juanna就會安排一班大專生到內地實習。
希望將關愛活動恒常化
至於Anthea今年就會幫手搞多啲關愛嘅活動，剛剛就聯同家園基金一齊搞咗派福袋活動，佢話家園係百仁基金前主席李家傑創辦嘅，今次特別幫佢哋安排福袋，送畀鯉魚門同油塘區嘅基層長者，陳寧寧同Anthea當日仲一齊探訪呢班長者添！陳寧寧話希望呢類活動恒常化，未來擴展服務地區添！