政情：市建局「一姐」譚小瑩劈炮
市區重建局（市建局）突然爆出高層變動，消息話市建局行政總監譚小瑩已經請辭，有指譚小瑩同市建局主席蘇慶和一直「貼錯門神」，兩人經常鬧意見不和，「分手」係遲早嘅事。市建局發言人證實譚小瑩尋日請辭，離職日期要再商議，據知譚嘅通知期要三個月，而行政總監空缺將會進行公開招聘。
傳與蘇慶和作風迥異
資料顯示，譚小瑩於○六年加入市建局，出任執行董事七年多，前年三月獲政府委任行政總監，榮升市建局「一姐」，任期原本於明年三月屆滿，之不過尋日就傳出佢「劈炮」消息。
有知情人士對此唔感到意外，形容譚小瑩離職係遲早嘅事，因為佢同蘇慶和處事作風好唔同，「蘇先生比較係發展商思維，但譚小姐就有社會使命。」另有政界中人爆料，蘇慶和一度有意外判收樓工作，雖然最終不了了之，由此亦可見蘇譚二人作風理念唔同喎。