政情：未攞到公司註冊 熱血公民政黨化無期
成立咗六年嘅「熱血公民」，其成員經常企喺社運最前線，但組織成員鄭松泰喺前年進身立法會後，喺舊年正式宣布熱血公民全面撤出社運，推動政黨化。沉寂一年，熱血公民完成制訂黨章架構等規範，但至今仍未取得公司註冊，唔能夠好似其他政黨咁收捐款或以買賣賺取經費，所以估計真正完成政黨化之路，仍然係遙遙無期！
熱血公民主席兼立法會議員鄭松泰話，以前熱血公民係行動派，分首領同手足，政黨化後就要有規有矩，喺過去一年集中處理制訂黨章、內閣架構、換屆制度等，下個月會推出網站公布詳情。
唔可以收捐款
雖然政黨化有阻滯，但該黨正備戰明年嘅區議會選舉。鄭松泰話依家喺新界西設立約十個服務處，冀望下屆區議會選舉時可以有超過十位社區主任參選，但佢亦承認熱血公民至今仍未完成公司註冊，變相唔可以用政黨名義去預約公共場所舉辦活動，更唔可以收捐款等。