中環出更：姚松炎謝票 獲贈「胡志偉」畫像
姚松炎代表泛民主派出戰立法會九龍西補選但意外落敗，而民協票倉就失守。姚松炎尋日去深水埗謝票，期間獲市民送上其畫像作鼓勵，畫上仲寫上「Never Give Up（永不放棄）」作鼓勵添，點知畫像激似立法會議員兼民主黨主席胡志偉。咁奇？
睇真啲幅繪畫，雖然眼紋一樣多到可以夾死蚊，但對眼就大咗好多，而且似胡志偉添，唔通姚松炎真係喺選舉期間太少落區，又冇擺街站，搞到連支持者都認錯人？不過，畫像嘅上款寫上「Dr. Yiu（姚教授）」，睇嚟該名支持者真係無畫錯喇！
馮檢基鬧姚議題單一失選票
另外，代表民協參加泛民初選嘅馮檢基尋日接受傳媒訪問，首度開腔回應補選，佢認為姚松炎落選係因為初選分化咗民主派支持者，仲話當務之急要檢討泛民嘅初選機制，又強調民協喺補選中冇放軟手腳添。佢之後又繼續鬧姚松炎參選議題單一，側重遭取消議員資格且關顧基層不足，最終咪流失選票囉！
卓妮