政情：高官評分暴瀉 波叔跌鑊甘鄭若驊墊底
新一份財政預算案受到各界抨擊，指斥派糖唔均，搞到民怨沸騰！最新一份民意調查顯示，市民對三名司長同十三名局長評分全線下瀉，其中制訂預算案嘅財政司司長陳茂波（波叔）嘅評分大跌一成半，成為跌幅最大嘅問責官員。不過，正所謂低處未算低，啱啱上任兩個多月嘅律政司司長鄭若驊，今次係首次被納入調查，但只有二點○七分，評分包尾。
香港研究協會喺今個月六日至十四日，以電話訪問一千一百零八名市民，對特首、司局長及特區政府的滿意度評分，以五分為非常滿意，一分為非常不滿意計算，波叔獲二點一九分，較上次調查下跌○點三七分，係錄得最大跌幅嘅官員。至於首次納入調查嘅鄭若驊則只得二點○七分，成為喺問責官員當中最低分嘅官員。
喺局長方面，十三位局長嘅評分都錄得跌幅，雖然食物及衞生局局長陳肇始嘅評分最高達三分，但較上次調查下跌○點○五分，係連續第五次排喺榜首，而民政事務局局長劉江華就繼續包尾，只獲得二點三一分。
預算案評價差拖累
香港研究協會就認為，結果反映咗市民對問責團隊嘅工作表現未感滿意，相信市民對預算案評價欠佳，係拖累政府整體觀感嘅原因之一。
另外，預算案公布逾兩星期，社會要求全民派錢嘅聲音此起彼落，而波叔尋日出席一個網台節目時，繼續死撐話唔會一刀切全民派錢，仲數白欖咁講多次有乜嘢關愛共享嘅措施，亦承認當中或有漏網之魚，需要用關愛基金做「補漏拾遺」，亦係最適合嘅方法，佢相信借助關愛基金嘅經驗能夠設計出理想嘅補漏方案，又話勞工及福利局局長羅致光會努力研究點做。
依家政府庫房水浸，市民都只係想分享經濟成果，可以攞番粒糖嗒吓啫，波叔何必攬實啲錢做守財奴呢？