東網直播巴士打吡第二回 九巴元朗 冠忠南區 再鍊過

「橙軍」火力強橫聞風喪膽

今季換上年輕教頭曾昭達的九巴元朗，開季以來演出可人，尤其是強橫的入球能力，更令不少對手後防聞風喪膽，幾支榜尾球隊都曾遭「橙軍」數鑊甘，就算前列分子，面對九巴元朗往往要陷於苦戰。「球隊今季嘅演出，對第一季做教練嘅我嚟講，當然滿意啦！但滿意唔等於自滿，現時上下都好齊心，希望全隊可以向更高層次邁進。」被外界視為季尾「最佳教練」熱門之一的曾昭達說。

問到客軍冠忠南區近期「遇神殺神」，今仗九巴元朗可有特別部署？「對唔同對手都會有唔同部署，南區近期好弗，主場先後贏過南華同傑志，進攻上發揮好好，我哋一定要小心應付。我哋有主場之利，加上擁躉支持，希望演出可以令大家滿意啦！」「達Sir」大賣關子。

冠忠南區5連勝弗到漏油

同樣賣關子的還有冠忠南區主教練鄭兆聰：「我哋全隊都好期待今場『巴士打吡』，元朗喺主場演出一向厲害，但我哋唔會驚亦無太大壓力，一季之中好多場賽事都好重要，『巴士打吡』只係其中一場，我哋下月中對和富大埔爭入『菁英盃』決賽都好重要，大家有晒默契，總之做好防守，踢番南區自己風格就夠！」Ricky信心十足地道。冠忠南區自季中羅致馬高斯和內田智也，加上梁子駿和史比等傷兵傷愈，令該隊戰績飆升，自踏入2017年後更已錄得5連勝，兩支「巴士兵團」硬碰硬，絕對好睇過戲！

_