警方居然怕關公 唔通愧對武聖人

係人都知,三國名將關羽集「忠、義、仁、勇、信」於一身,有武聖人之稱,亦因為咁,揸槍搵食嘅差大哥向來有拜關帝嘅傳統,最近有警署傳出要「革扯」關二哥,到底當中有咩景轟,唔通有人不忠不義,愧對聖人?

話說葵涌警署刑事部阿頭最近新官上任,突然喺無知會同事下,向差館內嘅關帝像下「驅逐令」,甚至不顧眾人反對,揚言唔拎走就掉爛佢,結果喺移送茶水房途中,爭啲連關公把青龍偃月刀都整爛埋。聽聞呢單嘢辣(殸火)晒班前線伙記,有人仲直接向指揮官投訴添。

古語有云︰「忠臣不事二君」;《聖經》亦教落,人不能又事奉主又事奉財利;今次人大釋法,核心主題亦無非係政治效忠,可見人貴「忠義」係古今通例。再講吖,警隊拜關公已有八十幾年歷史,一直相安無事,已經成為警隊文化嘅一部分,家陣因乜解究硬係要除之而後快,咁就要問番當事人至知喇。

講到呢度,功夫茶不期然諗起日前有水警受訓後唔見彈匣及十四發子彈嗰單嘢,事發至今兩日,失物仲未尋回。你知喇,家陣風頭火勢,人大釋法「消獨」,港獨分子蠢蠢欲動,一旦子彈落入別有用心人士手中,後果不堪設想。早幾日港獨分子示威期間掘街磚收集玻璃樽,幾乎重演旺角暴動「讓磚頭飛」一幕,萬一再演變成「讓子彈飛」,分分鐘死得人多(口架)!

咪以為杞人憂天吖。大家有眼見,警隊呢幾年「鬼影幢幢」,佔領期間有女高級警司頭戴皇冠警徽,擺明緬懷前朝「事頭婆」,最頂癮嘅係,呢位警花事後竟然獲得擢升。咁都唔止,有黃絲男督察涉嫌擅用警隊內部電腦系統,取得喺佔領區值勤同袍嘅資料後喺網上轉發,實行幫對家起底點相。至於警員涉嫌向黑社會集團通風報信,被老廉拘捕,以至高層被指包庇南亞犯罪兵團等醜聞,更加係醜上加醜。今次失子彈事件究竟係意外定人為,唔該當局查清查楚,畀公眾一個交代。

講開又講,類似失子彈事件三日唔埋兩日就爆一鑊,大家早就見怪不怪。早排警方擺烏龍,將環保梘工場誤作軍火庫,結果撤控收場又拒絕道歉,全城鬧爆。查實求其用膝頭哥諗吓就得,只要警隊內部多幾個「身在漢營心在曹」嘅二五仔,搞事分子武器源源不絕,仲使鬼土法煉鋼咩!

始終都係嗰句,堡壘最易從內部被攻破,警隊上樑不正下樑歪,高層有高層舔着數,前線有前線爆醜聞,自身難保咯喎,又點怪得香港地牛鬼蛇神橫行無忌,也文也武吖!