古人話，治病必求於本。係人都知，本港樓價高處未算高，無殼蝸牛望樓興嘆，癥結在於供需失衡，可惜港府增加供應無方，獨沽一味用行政措施打壓需求，治標不治本咯喎，樓市又點可能健康發展吖。
呢嗱，港府宣布新一輪「加辣」措施，由尋日起全面提高住宅物業交易嘅從價印花稅，除咗無持有其他住宅物業嘅香港永久居民可獲豁免，只需繳交最多百分之四點二五，其餘稅率劃一提高至百分之十五，增幅達兩、三倍，出手不可謂不重。之但係睇番尋日開售嘅一個一手樓盤，仍然有人無懼重稅入貨，有位喺內地做生意嘅仁兄係咁講嘅，家陣內地樓價分分鐘拍得住香港，租值唔啱比例，加上人民幣貶值，錢擺喺度都係冇用，所以斥資一千萬港元買入兩個單位收租，畀百幾萬稅款都在所不惜，講到尾咪因為睇好後市囉。
有業界人士就講得啱嘞，市場普遍預期人民幣未來幾年會貶值，即使今次調高印花稅幅度，埋單計數分分鐘只係增加些少成本，加上國際熱錢流入，預期新辣招對樓市只會產生短暫影響。高官口口聲聲「加辣」有助壓抑投資需求，似乎樂觀咗少少囉。
講真，加印花稅之前唔係未試過，而且仲有「額外印花稅」、「買家印花稅」等，名目多多，結果係點有目共睹，所謂「辣招」好快就因為被市場適應而失效，樓市靜完一輪又試掉頭回升。好簡單，住屋係剛性需要，增加印花稅或者可以打擊炒家，但亦會連累埋真正用家，事關買賣成本增加咗，投資客為賺取「合理利潤」，自然待價而沽，結果放盤量少咗，市民上車反而難過舊時。
所以話，講乜都假，只有增加單位供應最實際。高官呢排猛咁吹噓私樓施工量、供應量以至樓花銷售數據如何如何理想，其實又係好睇唔好食，水分多於一切。鬼咩，家陣好多一手新盤其實係不設間隔嘅「納米樓」，所謂「住好啲、住大啲」，其實只係得啖笑。
事實勝於雄辯，今屆政府上台之初係威係勢，又話「寸土必爭」，又話房屋問題係施政重中之重，結果咪又係得個噏字。唔使講第樣，淨係睇吓輪候公屋條龍愈來愈長，距離三年上樓目標愈來愈遠。好多市民公屋又輪唔到，私樓更加唔使旨意買得起，高不成低不就，惟有跪地餼豬乸，連豬欄、雞棚劏房都唔放過囉。
始終都係嗰句，官僚靠得住，豬乸會上樹。港府壓抑樓市頭痛醫腳，腳痛醫頭，市民想圓置業夢，都係寄望自己中六合彩實際啲！