內地城管蝦蝦霸霸，經常暴力執法，早就有口皆悲，之不過講到也文也武，欺凌弱小咯喎，有「港版城管」之稱嘅食環署職員，一啲都唔輸蝕o架。
呢，一名七旬外判女清潔工尋日工作時見地面污糟咗，用清水沖走，咁啱被路過嘅食環署職員發現並票控，當時婆婆驚到當場大哭求饒，又話會清洗現場，點知對方不為所動，仲報警求助，結果擾攘一輪後牛肉乾照開，一千五百元照罰。
七十幾歲人仲要出嚟打工，點講都令人同情，況且倒水又唔係殺人放火，可唔可以畀次機會，下不為例吖？正如有網民話齋，阿婆搵幾耐先搵到千五銀，咁罰法認真冇陰功；有網民甚至發起集資協助阿婆交罰款，「港版城管」民憤之大，可見一斑。
成日話法律不外乎人情，到底兩者之間應該點平衡？有個發生喺印尼嘅故事係咁嘅，一名老婦因為屋企太窮偷木薯食被告上法庭，罪成罰款。喺呢個時候，法官自掏腰包幫助老婦，又要求在場人士幫老婦繳交「罰款」，因為社會上竟然有人因為捱餓而鋌而走險，所有人都難辭其咎。
當然喇，同呢班「港版城管」講大道理，等於對牛彈琴。佢哋欺老凌弱，案底早就厚過電話簿。之前有位善心伯伯喺沙田免費幫人修理單車，食環署一度要拉要鎖，結果都係因為群眾壓力至作罷。至於幾年前接連發生小販被追捕期間畀車撞傷甚至跳河浸死事件，更加引發天怒人怨。
可能有人會話，法不容情，違法就係違法，點可以差別對待o架！呢個就係問題重點嘞。大家有眼見，食環署職員對住弱勢群體就話鐵面無私，有法必依啫，一遇着惡人立刻變鵪鶉，粒聲都唔敢出。同樣係小販阻街，老弱傷殘嘅追到氣咳，雕龍雕鳳嘅任擺唔嬲。部分食肆夜晚好似攞正牌咁，將啲枱擺通街，以至廣告易拉架搞到途人「寸步難行」，幾時見過食環署執法？你話嘞，呢啲唔係欺軟怕硬，選擇性執法又係乜？
話時話，執法欺軟怕硬、雙重標準絕對唔係食環署嘅專利。佔領之亂收皮超過兩年，被捉嘅都係啲魚毛蝦蟹，幕後金主及搞手至今毛都唔見少一條，特別係嗰啲有外部勢力撐腰嘅，當局更加好似食環見紋身漢咁，即時龜縮。至於自發向漢奸潑穢物嘅俠義之士，只因無權無勢，結果被拉人封艇。又好似警方咁，老屈智障人士就叻，打擊假難民犯罪集團又唔見咁積極，試問公平正義何在！
殺人放火金腰帶，修橋補路冇屍骸，呢個就係今日香港嘅寫照。成個社會黑白顛倒，是非錯亂，家陣知點解喇！