政情：鄭松泰鬧游梁倒本土派米
熱血公民立法會議員鄭松泰早前宣誓就職時僅輕輕在誓詞「加料」，冇好似青年新政游蕙禎同梁頌恆咁公然宣揚港獨，起初被部分本土派支持者質疑佢冇膽，但隨着游梁宣誓風波引發全國人大常委會主動釋法，兩人被法庭取消議員資格，有人又改為大讚鄭松泰醒目及識得顧全大局。鄭松泰尋日更炮轟游梁「累街坊」，令部分民眾離棄本土主張，呼籲無論係統派抑或獨派嘅本土人士，都應與青政同游梁「切割」。
鄭松泰尋日下午出席城大一個座談會時指出，半年前有關本土嘅討論獲得主流民眾支持，例如喺中港足球大戰時有港人噓國歌，有關報道喺互聯網動輒呃到逾一千個「讚好」，但經歷宣誓風波後，近日再有噓國歌嘅報道，就僅獲不足一百個「讚好」，反映本土主張已被民心背棄。
呼籲支持者與青政「切割」
鄭松泰形容游蕙禎同梁頌恆嘅辱華言論「過晒火位」，令一般香港市民反感，並且讓中央政府可以用民族大義為由干預香港法治，認為兩人要為此負上責任，其他統派同獨派人士應該與青政「切割」。