秋風起唔止三蛇肥，大閘蟹仲肥，正係一家大細親朋好友大快朵頤嘅好時候，可惜吖，由於食環署把關不力，家陣大閘蟹就冇得食嘞，倒瀉籮蟹就差唔多，如果食咗大閘蟹落肚就更大鑊，分分鐘攝入致癌物二噁英，唔驚就假。
講起就把幾火，食安中心九月抽查市面嘅大閘蟹，拖到前日先至公布結果，有冇再遲啲吖。化驗結果顯示，兩個來自江蘇太湖大閘蟹嘅樣本二噁英水平超標，最高超標逾五倍，後果可大可小。最大鑊嘅係，兩個涉事養殖場佔全港大閘蟹進口量七至八成，即係話市民早就將問題蟹食咗落肚，就算當局宣布即時停售及回收都補唔番喇。
二噁英話明係致癌物，當然唔係鬧着玩啦。醫生係咁講嘅，二噁英經由燃燒電子廢物、醫學塑膠製品等產生，污染大閘蟹嘅生長環境或飼料，令二噁英積聚蟹內，人體攝取後可存於脂肪長達十年，影響生殖能力，孕婦攝取過量仲會影響胎兒發育添，真係諗起都打冷震。難為食環署仲好意思死撐，話恒常化驗需時一個月係好正常喎，仲話「拉勻一世風險唔算高」喎，呢啲點止係卸膊，簡直係涼薄喇。
你話唔係咩，大閘蟹係港人至愛，每年進口量驚人，食環署把關點可以烏瀡瀡（口架）。再講吖，出事後江蘇當局即時暫停受理涉事養殖場嘅出口報檢，仲話會盡快公布調查結果，兼踢爆埋港府從來都冇將二噁英列為輸港大閘蟹嘅檢測要求。咁你話嘞，成件事係咪港產官僚把關疏忽吖？係咪抽驗效率低下吖？明知內地黑心食品多如牛毛，大閘蟹出事亦唔係第一次，食環署仲唔打醒十二分精神，同存心靠害有咩分別喎。
講開又講，今次爆大鑊，除咗市民擔驚受怕，商戶亦一殼眼淚。有老字號零售商大喊冤枉，話入口嘅大閘蟹來自自設養殖場，只不過透過出事養殖場報關供港，要求食環署檢驗清楚，唔好累及無辜喎。唔少食肆亦生意暴跌，鬧爆食環署一刀切要求下架停售，又唔提供善後安排，簡直攞命。
當然啦，冇嘢可以凌駕公眾健康之上，從嚴處理食安問題無可厚非。問題係，今次分明又係食環署把關不力在先，食安中心檢測慢十拍在後，卒之引起公眾恐慌及商戶損失，證明食安官僚從來冇吸取教訓，從未將市民福祉放喺心度。
都係嗰句，民以食為天，食以安為先。市民冇咩望，只係望有安全食品啫，如果連咁低微嘅願望都落空，食環署根本冇存在價值，呢個政府畀人鬧爆係廢柴，知點解喇！