狐狸試圖偷樹上嘅葡萄，點知偷極都唔成功，於是老羞成怒，大踩特踩葡萄係酸嘅，估唔到家陣有人偷完葡萄，食到津津有味流晒口水不特止，抹完嘴仲一個屈尾十喺度彈三彈四，惡意攻擊，你話呢啲係咩心態吖！
話說周世鋒等多名內地維權律師涉嫌顛覆國家政權罪案件，尋日開始喺天津法院審理，其中曾參與多宗維權案件、目前正取保候審嘅女律師王宇，日前接受本港幾間傳媒專訪，披露外部勢力出錢出力介入內地維權事件，包括喺英國、瑞士等地搞培訓班，教授點樣抹黑中國政府，並向佢哋灌輸西方思想；仲話有人企圖挾持佢個仔去美國，用作「籌碼」攻擊中國政府添。
內地當局舊年七月大舉搜捕維權律師，成為海內外焦點，箇中原委眾說紛紜，王宇作為當事人現身說法嘅專訪，被海內外媒體廣泛引用，亦係順理成章嘅事。之不過引還引，有人陰陽怪氣，有人話裏有話，指桑罵槐，簡直令人嘆為觀止。好似《信報》咁吖，引述完一大輪，之後又訪問王宇所謂友人，話佢喺片段中「似讀稿」，又話「明眼人都覺得太假」喎。得咗便宜仲賣乖，呢頭話假，嗰頭引用，唔驚向讀者推介東方嘅咩！
不過比起《蘋果日報》咯喎，呢啲都係小兒科啫。佢哋涉嫌抄襲報道內容後，仲公然玩抹黑，話咩香港記者「受安排北上採訪」、「對於成為宣傳機器不滿卻無奈」，仲話內地官網率先刊出專訪，利用港媒做傳聲筒添。
嗱，呢啲咪係來說是非者，便是是非人囉。大家有眼睇，每逢「民主阿婆」、「李漢奸」巡迴英美哭秦庭，唱衰國家同香港，「爛果報」例必全程直擊，貼身報道。至於漢奸黎同外部勢力關係密切，更加係公開嘅秘密，佢老哥嘅近身助手Mark Simon有美國軍方情報背景，漢奸黎資助反對派嘅幾千萬元政治捐款，據聞就係由呢位洋人經手，壹傳媒充當外部勢力嘅宣傳機器及傳聲筒，絕對係珍珠都冇咁真。仲有吖，「爛果報」經常引用內地官方通訊社消息，唔通又係中共「宣傳工具」同「傳聲筒」咩？
講到外部勢力，尋日居然有自稱《美國商業新聞網站》駐港記者電郵本報，要求東網交代如何獲得採訪王宇機會等詳情。喂，保護消息來源係傳媒界嘅常識，亦係職業道德，點可以求其話畀人知o架，如果功夫茶問呢位記者，係邊個老闆叫你咁做，你估佢又會唔會講你聽吖嗱？佢再試下向其他報館攞料，睇人哋畀唔畀吖嗱？唔通東方今後要採訪新聞，仲要好似反對派政客咁，向美國人先請示、後匯報咩？難為美國開口埋口言論自由、新聞自由神聖不可侵犯，又話當年報道水門事件嘅記者點堅拒透露新聞來源，點樣點樣英勇，家陣居然掉番轉頭，侵犯報章編輯自主同商業秘密，簡直吹脹。
東方為民喉舌，服務對象只有讀者，邊度有真相，邊度就有東方，如果勉強要講東方係「宣傳機器」，都係一部為讀者提供最快最新最全面資訊嘅「機器」。講番維權律師今次專訪，明明係「爛果報」甩咗單大新聞，搞到要追住同行屁股，享用對手嘅成果，仲要邊用邊玩抹黑，都可算低莊之極。不過冇計喇，開講有話「東方做，蘋果盜」，睇吓「爛果報」侵犯東方知識產權，定罪嘅案件仲厚過本電話簿，就知咩料喇！
可惜吖，呢個世界往往唔係黑就係黑、白就係白咁分明，漢奸傳媒剽竊東方勞動成果，港府次次都玩縱容包庇；爛果報宣淫販賤老作新聞，當局次次隻眼開隻眼閉。最近漢奸黎屋企一再被示威者包圍抗議，如果唔係港府有法不依，姑息養奸，受害者使乜好似義和團上身咁吖？反觀東方堅持報道真相，堅持愛國愛港，堅持揭批漢奸餘孽，反而遭到當局針對，淫審處、衞生署、警務處、食環署、消防處以至香港郵政等，輪番上陣，一個比一個兇狠，真係唔到你唔服。
所以幾時都話，愛國愛港冇運行，反中亂港有着數。呢，有辦你睇（口架）。有一家國企啱啱以五億港元收購一間出版反中亂港刊物嘅機構，呢個機構同「爛果報」可以話係一丘之貉，分別只不過係一個「真小人」，一個「偽君子」咁解，連年虧損之下反而獲國企送大禮，簡直令人難以置信。講真，北大人對反中媒體情有獨鍾，都唔係今時今日嘅事咯，當年壹淫媒借殼上市，中銀「居功至偉」，結果係婦人之仁，遺禍至今。家陣世道艱難，東方堅守崗位，為香港為國家盡心盡力，但最終換嚟嘅待遇竟然比賣國賣港嘅媒體仲差，《東方日報》同《東網》被內地封殺，集團創辦人遭內地網站惡意誹謗，呢啲唔係黑白顛倒、是非不分又係咩呀！唔好話讀者大眾莫名其妙，功夫茶嘅同事都好唔忿氣呀！
始終都係毛伯伯講得啱︰「誰是我們的敵人？誰是我們的朋友？這個問題是革命的首要問題。」香港回歸後風雨如晦，簡直沒有最亂，只有更亂，最根本原因咪就係有人分唔清好壞，辨不明是非囉。不過功夫茶始終相信得道多助，失道寡助，善惡到頭終有報，好似漢奸黎呢條盲毛，睇路看鏢呀！