古人相信天人感應，其中最經典一幕係元代戲劇家關漢卿筆下嘅竇娥含冤被斬首，結果六月酷暑天忽然落起大雪，悲壯之極。有咁啱得咁蹺，香港尋日又出現「六月飛霜」異象，唔使問阿貴，梗係民間有重大冤情，老天爺睇唔過眼示警喇！
唔係講笑，尋日下晝成個香港風雲變色，雷電交加，大埔屯門等多區冰雹大作，部分更好似一蚊銀咁大，都咪話唔誇張。據講今次係近五十年來第七次農曆六月落雹，而對上一次已經係○八年嘅事，連堪輿學家都話，六月飛霜係古時對皇帝或國師嘅警示，家陣正值更換當權者嘅敏感時刻，話唔定會有大事發生；又話連一向低調嘅廉署都大地震，顯示社會亂象同怨氣已經達到沸點，真係唔到你唔信邪。
咁又係吖，廉記呢排好似撞咗邪咁，三日唔埋兩日爆大鑊，高層一時話走一時話留，直頭亂過亂世佳人。廉記自身難保，市民旨意佢哋幫手主持公道，蚊都瞓蛇都死，唔怨氣沖天至奇！
話時話，香港近年廉潔招牌搖搖欲墜，廉署要負最大責任。大家有眼見，前特首曾蔭權爵士單畸士由立案調查到落鑊起訴，拖咗超過三年，連前刑事檢控專員江樂士都形容拖延時間之長「可以列入世界紀錄」；至於曾爵士嘅愛將、人稱「貪湯」嘅前廉政專員湯顯明，更乾脆放生了事，香港幾代人辛辛苦苦建立嘅法治同廉潔形象，就係咁一鋪清袋，你話係咪悲哀吖。
以前廉署鼓勵市民挺身而出舉報貪污，有句口號「廉署保密，密密實實」，計功夫茶話齋，呢句嘢家陣改做「調查進度，密密實實」就差唔多。淨係睇吓壹傳媒老闆「漢奸黎」涉及嘅數千萬元黑金案，明明鐵證如山賴無可賴，點知廉署查來查去都係得個吉，調查進度何止「密密實實」，直頭「臭屎密冚」添喇。
咁就難怪有人質疑，港府之所以對漢奸餘孽束手無策，就係因為買佢哋背後嘅洋主子怕，投鼠忌器。既然官府龜縮，市民惟有自己出手，話口未完，尋日又有民間義士包圍黎宅聲討漢奸賣港賣國。黃台之瓜，何堪再摘，家陣社會已經夠晒亂，港府仲要倒行逆施，顛倒黑白，任由牛鬼蛇神橫行霸道，香港想唔死都幾難。
當然喇，玄學嘅嘢信則有不信則無，「天人感應」只係對管治者嘅警惕，正所謂三分人事七分天，香港社會亂象叢生，房屋、安老、醫療、教育問題一大堆，加上本土、港獨思潮氾濫成災，面對種種挑戰，港府點都要自己諗計解決，一味望天打卦，始終都係死路一條嘅咋！