成日話港產官僚大事做唔到，小事做唔好，真係冇講錯（口架）！好似人口統計咁吖，明明係幾年一次嘅例行公事，應該駕輕就熟至係，點知都係搞到倒瀉籮蟹，烏龍百出，真係唔到你唔服。
話說統計處今年首次以電子化形式進行全港中期人口統計，結果問題多多，唔係平板電腦上載資料速度慢如烏龜，就係俗稱「尿袋」嘅充電器淪為流動炸彈。不過呢啲都係小兒科，有網民組織引述外國網上保安機構測試，揭發網上問卷及流動程式伺服器極易受到攻擊，平板電腦連接政府伺服器時加密連接會降級至舊有版本，令黑客有機可乘，有關伺服器嘅保安程度，更評為不合格嘅F級添。
網絡安全不設防，市民「私隱線」失守，後果絕對可大可小。係人都知，人口統計資料極為敏感，市民身家性命財產一覽無遺，對於網絡犯罪分子嚟講，同「攻略本」冇咩分別嘅咋。
講開又講，全球早已進入網絡時代，當局依家至搞人口統計無紙化，本來已經姍姍來遲，估唔到應對網絡保安漏洞反應一樣慢九拍，如果唔係民間團體踢爆，可能依家仲瞌緊眼瞓。官老爺急急補鑊，話已安排獨立安全審計顧問重新檢視整個系統及保安設置，又強調伺服器冇受過攻擊，亦無發現資料外洩喎。嗱，冇事冇幹好地地，萬一出起事上嚟，呢隻鑊冇人孭得起（口架）！
一節見則百節知，港府網絡保安如無掩雞籠，對市民私隱唔嗲唔吊，呢啲只係冰山一角咋。講出嚟嚇親人，淨係舊年，網絡罪案導致金融體系損失就超過十八億元，比前年激增五成；每二十四秒就有一間企業嘅電腦誤入惡意網站，多達八成三商業機構受過「殭屍網絡」感染；而舊年寄存本港嘅釣魚網站數目，更加係前年嘅兩倍多。香港中門大開，早就淪為假難民嘅犯罪天堂，家陣居然變埋網絡犯罪天堂，諗落都幾悲哀。
有人話，今時今日打劫銀行嘅愈來愈少，但網上呃資料嘅愈來愈多，可謂一針見血。早排深圳公安破獲一個犯罪集團，就係利用非法所得嘅香港身份證辦理信用卡，進行各種網絡詐騙活動，港府資訊保安形同虛設，可見一斑。既然犯罪分子安坐家中打下keyboard就可以輕輕鬆鬆搵大錢，仲使真刀真槍搵命博打劫銀行咩？
所以話，騰訊老闆馬化騰話「香港科技發展總是差了那麼一點」，已經算係「口下留情」咯。計功夫茶話齋，香港連最基本嘅網絡安全都搞唔掂，仲好意思話提倡科技創新，未學行先學跑，咪盞笑大人個口！