同電訊公司打過交道嘅都知︰你嘈得愈大聲，就有愈多優惠，估唔到有航空公司都係一擔擔，航班延誤，顧客唔出聲就側側膊唔多覺敷衍了事，係要等到對方據理力爭至肯足額賠償，十足十唧牙膏咁款，真係唔到你唔服！
邊間航空公司咁離譜？唔使問阿貴，梗係醜聞多多嘅國泰航空喇。有讀者向本報投訴，話之前搭國泰機由英國倫敦飛香港，結果因航班延誤受阻十六小時，滯留英國期間，喺當地用膳花費二百幾港元，回港後佢向國泰追討膳食費，對方只係願意以一百美元禮券取代現金賠償，之後經多番追討，費盡九牛二虎之力，最終至成功追回膳食費咋。
咁都未算喎，事主後來得知原來根據歐盟規定，喺歐盟國家機場起飛嘅航班延誤超過四小時，旅客可獲賠六百歐元，於是向對方索償，點知今次國泰極速跪低，同意賠款。點解咁好死？慌唔係會哭嘅孩子至有糖吃咩！正如事主話齋，國泰一早唔提醒旅客有呢條條款，擺明呃人唔識法律啫。
嗱，唔係無的放矢o架。歐盟上述規定幾年前經台灣及歐洲旅客網上流傳，早已廣為人知，而部分航空公司亦喺官網詳細列明，反而國泰秘而不宣，點都講唔過去。家陣最大鑊係，淨係上述航班，受影響旅客就有二百幾人，全部足額賠償，已經講緊大拿拿百幾萬港元。如果好似法律界人士話齋，其他喺歐盟地區遇到航班受阻嘅旅客都可以向國泰索償，條數都咪話唔襟計。
咁就唔怪得國泰賠償成日諗縮數喇。試過有國泰飛意大利航班，又係臨門一腳延飛喎，點知國泰居然玩大細超，外籍旅客獲免費安排入住酒店，而港客就只獲免費的士往返機場，後來見眾怒難犯至一視同仁。國泰大搞雙重標準，賠償面前華洋不平等，仲要口口聲聲「香港人嘅航空公司」，實情係歧視香港人嘅航空公司就真。
當然喇，國泰近年服務質素不斷插水，國際排名跌跌不休，淨係安檢醜聞，已經一匹布咁長，好似上述讀者搭嗰班機咁吖，就係因為機師違規帶刀上機而取消嘅嘞，至於電槍怪漢闖禁區、行李炸彈驚魂以至押運現鈔失竊等，更加係無奇不有。冇計喇，國泰內部管理混亂，勞資糾紛不斷，唔出事至奇。聽聞家陣國泰機組人員正與資方就加薪及福利問題拗到面紅面綠，都唔知點收科添呀！
始終係嗰句︰物必先腐而後蟲生。國泰之所以搞成今日咁嘅田地，都係因為故步自封，不思進取。再咁落去，想唔由「香港之光」淪為「香港之恥」都幾難！