卡通片裏面貓捉老鼠，次次貓都畀老鼠玩番轉頭，估唔到現實世界亦係一樣，人蛇集團手法愈來愈專業，淨係偷渡路線已經千變萬化，令人防不勝防，結果咪搞到野火燒不盡，春風吹又生囉！
呢，有政黨日前上廣州同省公安廳負責人會面，對方透露人蛇集團不斷轉移偷渡路線及改變模式，由以往主要喺香港周邊嘅深圳、珠海等地落水偷渡，逐漸後退到其他環珠三角城市，例如廣州、東莞、中山等地落水逃避追捕，加大警方打擊難度，仲形容當前偷渡形勢「仍然嚴峻」添。
講真，人蛇集團居然識得用「敵進我退，敵退我進」嘅游擊戰術，繞過公安重點駐守嘅防線，都咪話唔高招。家陣乜都假，既然人蛇集團變陣，內地執法部門亦應該擴大防線。你知喇，道高一尺，魔高一丈，打擊偷渡集團係一場持久戰，好似港府早排大幅提高針對蛇頭嘅罰則，偷渡集團即刻改以人蛇自行駕駛快艇，駛入香港後舉手聲請免遣返，而蛇頭就留喺香港水域以外嘅「母船」上遙控，本港警方根本冇符。
事實證明，只要精神不滑坡，辦法總比困難多。自從內地公安部門今年二月同本港警方展開合作後，短短五個月內已拘捕三千名外籍人員，人數係舊年嘅兩倍多。查實假難民借內地做跳板嚟香港搵食，早就係公開嘅秘密，如果內地一早肯做嘢，就唔使畀人質疑打擊人蛇不力，想禍水南引，將香港當作排毒嘅「馬桶」喇！
當然，蒼蠅不叮無縫的蛋，即使人哋有心排毒，都要「馬桶」無遮無掩至得。好簡單，假難民嚟到香港，只要舉手聲請免遣返，一張行街紙在手，即係好似攞咗護身符咁，鍾意打黑工又得，作奸犯科又得，加上香港好食好住，如果獲法官同情，仲可以穩袋幾十萬衣錦還鄉，咁好招呼，唔爭崩頭至奇。有立法會議員就講得啱嘞，港府當務之急係停止向假難民發放法援，同時盡快興建禁閉營，兼夾拒絕向聲請者發行街紙，減低佢哋來港嘅誘因。總而言之，邊境咁闊，好難全部攔晒，香港一日唔退出禁止酷刑公約，始終事倍功半，如果港府咁都唔做，同包庇人蛇無乜分別。可惜吖，港產官僚好似借咗聾耳陳隻耳咁，甚至連同內地執法部門交流溝通都要政黨代勞，你話係咪食塞米吖。
始終都係嗰句，打鐵還須自身硬，假難民問題愈演愈烈，國產官僚固然有責任，港產官僚同樣難辭其咎。假難民搞到香港雞毛鴨血，人心惶惶，港府連最基本嘅保障市民生命財產安全都做唔到，愈來愈多人爭住移民，依家知點解喇！