名不正則言不順，言不順則事不成。好似康文署班救生員咁吖，三日唔埋兩日罷工，視市民福祉同安全如無物，仲好意思話係救生員，「害生員」就差唔多！
冇冤枉佢哋o架。職工盟轄下嘅港九拯溺員工會一早張揚今日發起全港大罷工，點知尋日已經急不可待，展開所謂野貓式罷工，其中葵涌葵盛游泳池只有一半救生員返工，而西貢銀線灣泳灘原本應該有十二名救生員當值，結果只有兩人蒲頭，要暫停救生服務，好多泳客乘興而來，敗興而歸，唔媽媽聲至奇。掃興仲係其次，最怕有泳客唔知頭唔知路照游可也，出起事上嚟，都唔知邊個負責。救生員郁啲就罷工，玩到上癮咁，你話係咪靠害嘞！
唔知攞景定係贈興，作為罷工搞手嘅工會發言人郭紹傑耍晒冧，話對引起市民不便表示歉意喎。喂，一句「對唔住囉」大晒咩？試下有個賊將你屋企洗劫一空，之後「對令你財物有所損失致歉」，睇下你又收唔收貨！講真，抗爭大把方法，放咗工玩一哭二鬧三上吊，悉隨尊便，救生員次次吼正泳季高峰同節假日發難，分明係擺市民利益上枱，作為同當局談判嘅籌碼，搞事阿頭道歉有幾多誠意，心照喇。
即係咁，救生員方面同康文署一直就人手問題各執一詞，工會話人手唔夠，呻到樹葉落，而署方就企硬夠晒人，誰是誰非外人好難判斷，之但係救生員成日講到自己得閒死唔得閒病咁款，似乎矯情咗啲囉，前排之嘛，傳媒踢爆多名教生員當值期間集體蛇王，大家圍埋打邊爐擦餐飽，不知幾疏乎，所謂唔夠人手，嫌人太少烚下烚下唔夠熱鬧咋啩？
嗱，救生員人手夠唔夠就唔知，但係假期多福利好就係人都知，大家應該記得，前年佔領期間，郭紹傑呢頭以「跌斷鎖骨」為由請一年病假，嗰頭充當漢奸黎「私人保鏢」，仲勇猛到涉嫌公眾地方打架，以至被諷刺「有力佔鐘，冇力返工」。當局批假批得咁手鬆，增加幾多人手都唔夠喇。
所以話啫，一隻巴掌拍不響。大家有眼見，救生員工業行動沒完沒了，幾乎好似風土病咁，都唔知爆過幾多劑，最弊康文署始終束手無策，連應變措施都欠奉，結果次次都倒瀉籮蟹，到頭來受損嘅咪又係公眾利益。
點講都好，做人做事最緊要有理有利有節，一味以小圈子利益綁架大眾福祉，只會不得人心，部分醫學界人士阻撓醫委會改革，搞到怨聲載道，就係最佳例子。做救生員定係「害生員」，只係一念之差，好自為之喇！