大文豪海明威嘅《老人與海》係不朽經典名著，其實香港人大可以寫番本《塑膠與海》爭一日之長短。點解咁講？睇吓香港嘅海洋咪知囉，除咗充斥大大件嘅塑膠垃圾，連肉眼幾乎睇唔到嘅微塑膠都一樣大量存在，引發環保災難，冇人可以置身事外o架。
咪以為微塑膠細細粒冇乜危害，事實啱啱相反，環保團體係咁講嘅，全球多達一百七十種魚類及海洋生物體內均發現微塑膠，港人常食嘅烏頭、蠔、丁香魚、青口等海鮮亦不能幸免。魚類及海洋生物吸收微塑膠唔止影響消化系統，最大鑊嘅係危及整條生態食物鏈，唔係危言聳聽o架，外國已有研究顯示蠔吞食微塑膠後影響生殖能力，魚類則出現腸臟變形，咁你話人類食咗呢啲海鮮，日積月累，點可能唔出事喎。
大家一定會問，點解海洋會有微塑膠呢？咁就要問吓大家係咪成日使用磨砂清潔產品嘞。呢類產品加入微膠珠以達致清潔效果，但因為體積太細，本港嘅污水處理設施無法過濾，導致佢哋直接排出大海。有學者喺大嶼山及吉澳水域打撈到與市面磨砂產品極為相似嘅微膠珠，證明排污問題嚴重。環保團體推算，每年有多達一萬七千多億粒微膠珠直接排出本港海域，相當於一百多架雙層巴士嘅重量，都咪話唔誇張。
大家睇到喇，香港人開口埋口環保，唔講仲以為個個有潔癖，其實只係葉公好龍啫。莫講話常用磨砂產品一啲都唔環保，淨係樽裝飲品咋，多達六成人每日購買，回收又做得唔好，搞到每日棄置量高達五百二十萬個，唔係送往堆填區，就係隨手丟棄。呢，早前「世界環境日」，環保團體喺全港十六個地點收集海洋垃圾，結果多達一點八公噸，絕大部分係塑膠廢物，證明港人既貪方便又冇公德心，唔醜就假。
當然啦，要搞好環保，市民固然要自律，港府亦有不可推卸嘅責任。可惜呢個政府係廢嘅，淨係二十年來對鶴咀「垃圾灣」不聞不問，已經知道官員搞環保根本係大隻講。上樑不正下樑歪，港府其身不正咯喎，市民自然有樣學樣，再咁落去，香港想唔淪為塑膠港、垃圾港都幾難。
香港人成日笑內地污染嚴重，無食不毒，不過自詡文明城市嘅香港一樣唔好得幾多，根本就係五十步笑百步。嗱，外國政府好似加拿大咁，已計劃立法禁止清潔產品含有微塑膠，港府就至今渾渾噩噩，胡混度日，有人質疑港產官僚飽食終日又無所事事，個腦早就膠化，唔係冇道理o架。