今日係大年初三，古人教落，呢一日稱為赤口，特別容易招惹口舌是非。呢嗱，大家不妨去深水埗或旺角走一轉，就知道乜嘢叫做家嘈屋閉喇。
唔好誤會吖，功夫茶唔係講緊鳩嗚兵團，而係無牌熟食小販。呢幾日公眾假期，唔少小販諗住開檔發筆新年財，其中深水埗桂林街最熱鬧，攤檔林立，十足夜市咁款。可惜吖，食環署收到街坊投訴，表明會嚴厲執法，結果同小販互相指罵，幾乎打交咁滯，加上有激進團體乘機搞事，直頭亂過亂世佳人。聽講班小販今晚會轉戰旺角喎，你話唔嘈到拆天就假咯。
即係咁，無牌熟食小販通宵叫賣，的確擾民，何況呢類攤檔無規無管，食物衞生無保障，市民隨時病從口入，當局執法無可厚非。不過咁喎，流動熟食小販大受歡迎，證明有市場，就講桂林街吖，逢年過節例必吸引大批無牌熟食小販，既然市民有咁嘅需要，點解當局唔順勢而為，將攤販納入監管，正正經經搵個地方畀佢哋經營呢？
正所謂，他山之石，可以攻玉。睇吓人哋台灣，台北有士林夜市，台中有逢甲夜市，台南有花園夜市，搞到有聲有色，早就成為遊客必到嘅景點。新加坡仲積極，政府唔單止增建小販中心，仲設立「小販學徒計劃」添。總而言之，發展夜市既可振興本土經濟，亦可創造就業職位，更可吸引旅客，一舉多得，何樂而不為呢？
講到吸引旅客，本港旅遊設施單調老化，景點來來去去三幅被，除咗購物仍然係購物，搞到水貨客愈來愈多，中港矛盾不斷惡化。其實，近年各界提出唔少改善建議，弊在民間熱政府冷，研究復研究，諮詢復諮詢，到依家仲係一事無成。又好似啟德郵輪碼頭咁，配套設施天殘地缺，業界建議喺碼頭平台花園發展酒吧一條街，順勢將東九龍打造成「啟德酒吧城」，投資者磨拳擦掌，可惜當局唔嗲唔吊，不置可否。嗱，咪話功夫茶又搵新加坡同香港比，人哋已經早着先鞭，香港搞得嚟怕且都變明日黃花咯。
當然喇，香港地產獨大，熟食檔又好，傳統小店都好，好多捱唔住貴租而關門大吉，導致本土特色漸漸消失。所以話，高地價、高樓價、高租金嘅「三高」問題一日唔解決，始終都係嘥氣。
講多無謂，行動最實際，港產官僚開口埋口話要發展本土經濟，唔該做啲實際嘢，唔好得個噏字。話時話，熟食小販就係本土經濟嘅一部分，與其趕盡殺絕，搞到怨聲四起，不如因勢利導，好好安置，係咪！