西諺有云︰石頭係鑽唔出血嘅。其實計功夫茶話齋，叫港府開倉派糖，分分鐘仲難過從石頭鑽血。不過咁，凡事都有例外，港府最近放出聲氣，指今年財政預算案唔單止唔會延續舊年「減甜」政策，反而會「加糖」添，唔通真係世界變？
梗係唔係喇，財政司司長曾俊華出名孤寒財主，之前面對市民要求派糖嘅呼聲，佢一味耍太極，一時話「審慎理財」，一時話「量入為出」，總之藉口多多，家陣忽然扮闊佬，唔係轉死性，而係迫於民意壓力咋。嗱，鬍鬚曾舊年估計今個財政年度有九十一億元盈餘，唔使問阿貴，又係錯到離題萬丈，四大會計師行早前預測本年度盈餘，最保守嘅都有四百億元，最多嘅更加達到七百億元，足足係鬍鬚曾估計嘅七倍有多。你知啦，家陣社會怨氣咁大，港府坐擁幾百億元意外之財，如果繼續撳實荷包一毛不拔，激起民變都似，鬍鬚曾知驚咯喎，仲點敢擇惡固執吖。
講真，港府肥到着唔到襪，財政儲備遠遠超過合理水平，早就應該還富於民，鬍鬚曾踢一踢郁一郁，畀市民鬧爆至肯做嘢，只不過係遲來嘅覺悟咋。當然啦，遲到好過冇到，聽講今次「加糖」嘅重頭戲包括增加薪俸稅同利得稅寬免，由舊年一萬元上限加到最少一萬五千元，另外亦會增加子女免稅額，至於基層市民嘅綜援同生果金，今年亦會繼續出雙糧，大家都有得甜一甜，算係皆大歡喜啦。
正所謂，取之於民，用之於民，開倉濟民天經地義，但淨係識派糖唔夠o架。大家有眼見，港府咁多年嚟累積派糖超過二千億元，結果貧窮人口不減反增，香港更加淪為貧富懸殊最嚴重嘅發達經濟體，證明一次性嘅派糖解決唔到根本問題。所以話啫，鬍鬚曾作為大掌櫃，最重要係謀劃長遠，特別係解決經濟結構單調嘅問題，只有多元化發展，做大個餅，市民多咗發展機會，至可以拉近貧富差距，咁至算係做好佢份工。如果唔係，年年估錯數，之後求其派糖敷衍民意，盞被人譏為「史上最廢財爺」咋。
講開謀劃長遠，聽聞鬍鬚曾會喺預算案交代長遠財政工作小組嘅研究建議，包括將部分盈餘用作短期波動較大、長遠回報較高嘅投資，聽落好似有紋有路，頭頭是道，但實際情況係點樣，究竟有冇料到，仲要睇過至知。