唔怕年年估錯數 最怕涼薄守財奴

唔係誇張o架，舊年鬍鬚曾預測本年度盈餘只有九十一億元，點知埋單計數，盈餘可能高達九百億元，你話係咪離題萬丈吖？其實，港產官僚估錯數早就唔係新聞，高估開支，少估收入，已經成為慣例，經常赤字變盈餘、盈餘變豬籠入水，大家早就見怪不怪喇。呢，回歸以來嘅十八份預算案，足足有十四份「開大」，即收入遠勝預期，累積少估近七千億元盈餘，都咪話唔誇張。尤其喺鬍鬚曾任內，更加係愈錯愈離譜，平均每年少計盈餘達六百億元。當中最離譜係10/11年度預算案，最初預測會出現近三百億元赤字，最終唔單止轉虧為盈，仲錄得逾七百億元盈餘，錯估金額超過一千億元，創下紀錄，唔怪得佢被封為「史上最廢財爺」喇。

本來呢，估錯數唔緊要，只要能夠善用盈餘，扶貧紓困，咁都可以將功補過嘅。可惜，鬍鬚曾唔止生性涼薄，一味做守財奴，仲不斷以所謂結構性財赤恐嚇市民，簡直九唔搭八。老實講，佢連每年嘅財政收支都估到離行離列，又何德何能預測未來吖。正如有人踢爆，鬍鬚曾不斷玩弄「狼來了」把戲，無非想推卸責任啫。

無論點都好喇，既然港府多咗筆「意外之財」，而且預料未來幾年都會有盈餘，正所謂窮到只剩下錢，睇怕鬍鬚曾都幾難再卸膊。聽講今次預算案將會加糖，除咗退稅、免差餉等一次性措施加碼，而且會撥款支援時裝設計等創意產業，來年政府開支更會大增一成一添。即係咁，一次性派糖措施雖然解決唔到根本問題，但有糖派總好過冇糖派，反正港府盈餘來自民脂民膏，還富於民天經地義，點都好過將錢擺喺庫房發霉喇。人哋澳門政府年年派錢，皆大歡喜，港府簡直冇得比。

當然喇，鬍鬚曾身為港府大掌櫃，只識派糖係唔夠嘅，最緊要制訂長遠嘅政策及措施，帶領香港向前發展。正如調查顯示，市民除咗關注預算案有幾多一次性派糖措施，亦關心預算案會投放幾多資源喺各大施政範疇，尤其係覓地建屋及遏抑樓價方面。嗱，呢啲就係民意喇，鬍鬚曾聽到未吖？

一句講晒，唔怕年年估錯數，最怕涼薄守財奴。香港貧富懸殊，問題多多，皆因港產官僚無能兼涼薄，如果今次預算案又再令人失望，鬍鬚曾吟詩都吟唔甩！