林子大了，乜鳥都有。有啲人好玩唔玩，居然變態到玩米田共，仲要係高空拋擲嗰隻。市民出街隨時禍從天降，行樓梯底戴頭盔都唔掂呀。
呢嗱嗱嗱，香港仔石排灣邨居民呢排真係出門都驚o架，事關屋邨隱伏唔知幾多變態狂徒，經常有排泄物飛濺而下，搞到平台、石壆滿布穢物，連低層單位嘅晾衫架亦難逃一劫，臭氣熏天，居民飽受困擾，苦不堪言。住喺香港，遍地黃金就話好啫，「漫天黃金」喎，貪馨香咩。
話時話，一個唔好彩中咗糞彈獎，臭係臭啲，至少冇生命危險，萬一被其他物件擊中，咁就大鑊嘞。呢，早幾日之嘛，青衣兩現擲物驚魂，先係三名少年無聊到極玩「即興飛單車」，咁大舊嘢從二十九樓掟落嚟，幸好只擊中住宅氣窗，無人受傷，否則分分鐘又添輪下亡魂。跟住又有一名失業男涉嫌從十九樓住所將一部吸塵機掟落街，飛墮大廈出入口粉碎，之後再玩空中飛刀，到場調查嘅警員險遭擊爆頭。
你話係咪牙煙吖，成個香港好似變咗戰場咁，雖然唔係真槍真炮，但高空擲物一樣可以殺人，呢啲殺人兇器乜都有，包括電視機、大鐵錘、剪刀、菜刀等，下次容乜易掟把青龍偃月大關刀落嚟o架？血的教訓歷歷在目，舊年旺角發生墮椅案，擊斃一名男途人，高空飛椅尚且殺人於瞬間，高空飛刀嘅危害性更加唔在講喇。所以話，今次無造成人命傷亡，算係執番身彩，不過下次仲有冇咁好彩就好難講嘞。
飛刀直下三千尺，疑似黃金落九天，面對禁之不絕嘅空中擲物問題，警方係咪要盡忠職守，做啲嘢保障市民嘅人身安全呢？嗱，要打擊空中擲物歪風，方法不外乎兩個嘅啫，一個係加強宣傳教育，提醒市民唔好以身試法，另一個咯喎，就係加強執法，將變態狂徒繩之以法，仲要重判重罰，以儆效尤。可惜吖，港府窩囊到極，連對付掟蕉議員都無晒符，對擲物狂徒更加束手無策，卒之咪搞到砰砰嘭嘭，物如雨下囉。
唔使講其他，淨係講早年旺角發生多宗高空擲鏹水事件，導致近百人受傷，點止震驚全港，簡直轟動全球添，事件經過咁多年，警方拉到人未呢？有破案線索未呢？舉多個例子，大家知唔知石排灣邨擲糞狂徒作惡咗幾多年吖？三年嘞！當局執法不力，甚至闊佬懶理，變態狂徒仲唔有恃無恐咩。
冇符喇，家陣香港係惡人當道，好人受氣，購物天堂淪為擲物天堂有乜出奇吖。計功夫茶話齋，高空擲物不長眼，小市民固然受害，官老爺都無法例外，隨時上天堂o架。