港府宣傳片成日叫市民「勤洗手咪做幕後黑手」，可惜有口話人冇口話自己，自己居然變成製造蚊患嘅幕後黑手，問你服未。
係咁嘅，房屋署近年喺全港多處大興土木，政府工程照計喺環境衞生方面應該以身作則，執正嚟做至係，點知結果啱啱相反，最近連場大雨周圍積水，署方居然闊佬懶理，搞到唔少地盤淪為大型「養蚊場」。呢嗱，記者喺深水埗蘇屋邨地盤發現，打樁工程留低多個約五米深嘅地洞，因為長時間冇人理，變咗大水坑，積水加垃圾，連青苔都可以見到，直頭係惡蚊嘅溫床。專家估計積水至少存在咗半個月以上，咁搞法，點可能唔惹蚊吖。
住喺附近嘅居民就慘咯，惡蚊入侵民居，好多人被叮到周身都係，大熱天時焗住要長期閂窗。咪以為淨係呢個地盤係咁吖，石硤尾邨嘅房署地盤同何文田愛民邨附近嘅港鐵地盤，一樣係處處積水，惡蚊為患。難為房署仲輕描淡寫，聲稱已經提醒承建商加強防蚊措施喎。其實，房署巡查不力，佢哋先至係蚊患嘅幕後黑手。
見微知著，香港環境衞生愈來愈差，地盤蚊患處處只不過冰山一角咋。呢，月前本港發現今年首宗本地感染日本腦炎個案，同舊年兩宗本地感染個案一樣，患者都係來自天水圍同一屋邨，區內蚊患有幾嚴重可想而知。正如有立法會議員話齋，當局後知後覺，唔識轉膊，加上部門各自為政，互相卸膊，環境衞生唔愈來愈差至奇喇。
講起真係搞笑，清潔香港運動搞咗幾十年，結果愈搞愈污糟。尤其係當年沙士肆虐，時任政務司司長嘅曾蔭權爵士被委任為「清潔大隊長」，又掃地又抹牆，話要清除全城衞生黑點喎，可惜有姿勢冇實際，做咗幾場清潔騷後就關人個關，時至今日，黑點一樣咁黑，你話係咪盞搞吖？
唔係講笑，近年香港好似撞邪咁，怪事多多，危機處處，令人防不勝防。再加上港府把關不力，防疫甩甩漏漏，一時禽流感，一時豬流感，一時鼠患，一時蚊患，搞到人心惶惶。嗱，家陣西非伊波拉病毒正不斷蔓延，威脅全球，連世界衞生組織都束手無策，有人擔心呢種惡疫隨時殺到香港，絕對唔係危言聳聽。
正所謂，好嘅唔靈醜嘅靈。車公早就提醒港人，「禍去禍來惟自招」，家陣香港時運低，社會嘈喧巴閉，永無寧日，政治經濟民生樣樣都唔掂，喺咁嘅情況下，防線隨時崩潰，惡疫乘虛而入，一啲都唔出奇。港府再唔提高警覺，加強衞生措施，到時睇怕又係跪地投降嘅咋！