潮流興保育，港府亦唔執輸，一時話要保護歷史建築，一時話要保護自然環境，講到天花龍鳳，可惜官僚志大才疏，眼高手低，結果弄巧反拙，添煩添亂。
嗱，當局今年初將大嶼山大蠔約四公頃用地列為「具特殊科學價值地點」，令呢個具有生態價值嘅地方受到法律保護，出發點本來係無可厚非嘅，但就被指侵犯私人產權而引起村民不滿，日前有批村民聲稱要恢復耕種，竟以挖泥機及鋤頭將沿岸部分紅樹林連根拔起，導致滿目瘡痍，生態嚴重受損。環保團體譴責村民破壞紅樹林，又指大蠔河周邊唔少土地已被發展商收購，質疑村民想出售丁權圖利；而村民亦承認剷平紅樹林或違法，但認為咁做係保護原居民權益，更指附近多條村都有原居民土地「被保育」，抗議行動陸續有來o架。
即係咁，任何破壞自然生態嘅行為都應該受到譴責，如果喺政府土地上砍伐或摧毀樹木，一經定罪仲可被罰款二萬五千元及監禁一年添。問題係，當局一聲令下將私人土地納入保育範圍，限制發展不特止，連興建丁屋亦受阻，咁又點可能唔引起村民不滿呢？今時今日，連內地都話要以人為本，何況香港係資本主義社會，更加唔可以隨便侵犯私人產權喇。
所以話，港府保育根本係大隻講，政策兒戲到極，既無配套措施，亦無補償準則，一味霸王硬上弓，唔止達唔到保育目的，反而引起村民怨聲載道。呢，早前當局計劃將大浪西灣納入郊野公園範圍，被人批評強搶民產，有村民發起「封村」行動，搞到滿城風雨。
自然保育無譜，歷史保育更加係七國咁亂。當局年前一口氣將千幾幢建築物列為歷史建築，當中七成屬私人物業，結果又係引起極大爭議，唔少業主仲趁古物諮詢委員會評級期間將建築物一拆了之添。最好笑嘅係，當年景賢里業主要求磋商保育及賠償方案，點知當局置之不理，等到業主動工拆卸時，當局先至如夢初醒，緊急宣布將景賢里列為暫定古蹟，最後以換地方式補償業主，可惜建築物已被拆到甩皮甩骨，外觀嚴重受損，修復後亦只能恢復八成原貌咋。山頂何東花園嘅下場更慘，雖然被評為暫定古蹟，但由於涉及數十億元賠償，港府知難而退，呢座八十幾年歷史嘅建築最終不保。反而咁喎，嗰幢不倫不類嘅舊政府總部西座居然獲得保留，你話係咪得啖笑吖？
俗語話齋，工欲善其事，必先利其器。港府要保育，冇人會反對，但如果淨係得把口保育，咁就不如早抖好過喇！