打工仔表現唔稱職，一係畀人炒魷，一係自己炒魷。不過凡事都有例外，好似嗰班管理強積金嘅基金經理咁吖，無論業績好壞，佣金照樣袋袋平安，問你服未。
唔係講笑o架。有工會分析市面上五百幾隻強積金回報後發現，當中近五成過去一年回報率低過通脹，接近九成跑輸盈富基金。最離譜嘅係，幫客人賺錢唔見佢哋咁叻，攤大手板攞錢就一啲都唔執輸，今年有六隻基金管理費不跌反升。打工仔投資輸贏貴客自理，基金經理穩賺不賠，唔怪得有人將強積金稱為「強輸金」啦！
打工仔嘅強積金供款好似滾水淥豬腸咁，兩頭縮水，咁落去始終唔係辦法o架。負責調查嘅立法會議員建議政府以「核心基金」取代現時嘅私人市場營運模式，即係成立公共受託人，由中央負責管理，話咁做既可以壓低收費，又可以提供同通脹掛鈎嘅回報喎。
聽落就幾吸引嘞，實際可唔可行呢？係人都知，強積金推行十幾年以來有口皆悲，特別係「高收費，低回報」，更加備受打工仔詬病。強積金制度千瘡百孔，先天不足，後天失調，小修小補根本無濟於事。近年當局推出過唔少所謂改革措施，包括半自由行、收費封頂、整合帳戶……名目繁多，可惜通通不切實際，打工仔照舊任人魚肉，引入「核心基金」能唔能夠徹底解決問題，好難唔令人懷疑囉。
仲有吖，港產官僚縮骨成性，想佢哋承擔責任，仲難過與虎謀皮。呢，積金局早排建議由港府負責營運同管理「核心基金」，點知官僚即刻耍手擰頭，旨意佢哋保障市民退休生活喎，盞嘥氣啦。
講嚟講去，要真正做到老有所養，始終都係要實施全民退保，呢個已經係社會共識嘞。不過咁，雖然當局最近發表由學者撰寫嘅研究報告，好似好從善如流咁，實際上只係拖延戰術嘅咋。呢，報告建議打工仔喺強積金外供多份老年金稅，而政府淨係出五百億元做啟動基金，之後就關人個關，結果引來劣評如潮。咪話功夫茶踢爆呀，當局無非想全民退保拉倒收場，就當交咗功課，即使計劃落實，政府一次過畀一筆錢就可以甩身。你話嘞，咁樣唔係縮骨又係咩呀？
一句到尾，全民退保有民意基礎，有財政條件，問題係政府有冇決心同承擔嘅啫。正如古人話齋，為政不在多言，顧力行何如耳，港產官僚與其日日吹水，或者煲無米粥，不如踏踏實實，推行全民退保好過喇！