天價劏房劏學子 港府無能成幫兇

嗱，根據招租資料，劏房位於一幢樓齡達三十六年嘅大廈內，單位面積三百七十多呎，業主竟然一劏四，改劃成每間面積八十呎嘅豆腐膶，其中三個劏房月租八千大元，另一個月租亦要四千元。換句話講，天價劏房呎租高達一百元，仲貴過半山區豪宅，問你服未。

記者致電業主查詢，對方唔肯安排睇樓，但就落足嘴頭推銷，聲稱單位全新裝修，既有無敵海景，又有免費Wi-Fi同私人洗手間，抵到爛咁話，仲拍心口保證只出租畀大學女生，保證安全云云。記者根據相片判斷，天價劏房細到只放得落一張單人床，放多張書枱就連轉身都有困難，呎租竟然冠絕全港，甚至冠絕全球添，都咪話唔誇張。

即係咁，香港人不嬲搵錢大過天，同座大廈同類單位，如果整個出租，租金只值一萬二千多元，分間成劏房後，租金收入即刻翻一番，接近三萬元，足足賺多一倍有多，你話幾和味吖！所以話，家陣入住劏房再唔係窮人嘅象徵，冇番咁上下身家根本住唔起，業主到底係有腦定無良，大家自己諗啦。

講起實在唏噓，一個安居樂業嘅城市，根本唔應該有劏房嘅存在，偏偏香港唔止劏房氾濫成災，甚至連天之驕子嘅大學生都要棲身劏房，就知道香港已經病入膏肓。講到尾，如果唔係前朝貪曾政府大搞教育產業，大學收外地生多多益善，又點會搞到學位難求之餘，連宿位一樣難求吖。更不堪嘅係，唔止業主賺到盡，大學一樣算死草，宿位年年加價，學生苦不堪言。

事實上，天價劏房只不過係本港房屋問題嘅冰山一角咋。根據官方數字，目前全港大約有六萬六千多間劏房，居住人口十七萬，實際情況只會更嚴重。香港係富裕城市，竟然有咁多人貧無立錐之地，簡直係香港嘅恥辱。最諷刺嘅係，口口聲聲將房屋問題視為施政重中之重嘅港府，覓地建屋寸步難行，竟然打起劏房主意，唔去取締不特止，反而計劃將劏房合法化，簡直唔知醜字點寫！

上樑不正下樑歪，劏房問題嚴重到咁嘅地步，一啲都唔出奇，事關負責拓土建屋嘅局長自己都劏埋一份，其他人點會唔係有樣學樣吖。計功夫茶話齋，家陣連劏房都創下天價，連天之驕子嘅大學生都要棲身劏房，民怨爆煲有乜出奇呀！