中環出更：罷課「鋒」波 公大論壇爆罵戰
言行惹火嘅學民思潮召集人黃之鋒今個月升讀公開大學政治及公共行政學系後，繼續高調作風，仲帶領該校學生會發動罷課，獲六百師生簽名支持，帶起公大政治氣氛。公大尋日舉行政改論壇，邀請之鋒同教聯會副秘書長林樂、愛港之聲主席高達斌及社民連副主席黃浩銘等惹火人物對陣。
話說教聯會會長黃均瑜早前將鼓勵罷課嘅學生比喻為黑社會，甚至伊斯蘭聖戰分子，之鋒就話唔知自己「邊一忽」似黑社會，要求林樂代表教聯會澄清，但林樂反而叫之鋒「你自己檢討咪得囉」，又唔肯回應「黑社會」論係咪代表教聯會立場，仲激動到企起身叫之鋒「你自己諗啦，做人做咁耐！」令全場幾十名學生嘩然，群起發言向林樂挑機。
除咗林樂，高達斌亦批評學生叫人罷課，就好似黑社會教人點樣打家劫舍賺錢，同教人走歪路、走私冇分別，但隨即又叫學生唔好對號入座。總之成個論壇大家就喺度鬧來鬧去，口水一輪就散場。
卓妮