環保已經係世界潮流，雖然政府都有呼籲市民減少浪費，不過屯門區議會二○二○年區議會掛曆、利是封及二○一八至二○一九區議會工作報告事宜工作小組早幾日就開會決定，來年印刷利是封嘅數量維持一百萬個。有環保團體對此就有微言，批評屯門區議會浪費。不過，該工作小組嘅召集人歐志遠就話一百萬個並唔多，因為利是封係供不應求喎。
歐志遠同工作小組另一成員李洪森都話之前冇直接同環保團體溝通過，但就有睇過環保團體嘅公開信，明白環保團體嘅觀點，所以佢哋會盡量喺環保同市民訴求之間取平衡，例如唔喺利是封上印生肖，亦唔用黏貼口，盡量令利是封可重用，甚至喺利是封上寫明重用建議。
歐又話，每年去區議員辦事處或民政署拎利是封嘅市民都大排長龍，冇辦法唔印，考慮到環保，所以都決定維持一百萬封，仲話一百萬聽落就好多，但屯門人口有五十萬，一人都唔止派一兩封利是，所以其實根本唔夠用咁話。