政情：總辭不補選? 泛民鬥耍手
全國人大常委會決定政改框架後，人民力量立法會議員陳偉業曾經倡議二十七名泛民主派議員總辭，之後再透過補選入番議會，以爭取市民授權否決方案。聽落呢個倡議已經好激，點知尋日有學者提議泛民議員總辭之餘，仲要杯葛補選，直至一六年立法會選舉為止，真正向北京公開表示不合作態度，亦畀泛民深刻反思其角色。呢個建議咁激，連人力都有保留，部分議員更加左閃右避。
學者話，其實北京「劇本」係想泛民有份參與，最體面安排就係佢哋有得選，頂多畀泛民宣揚其政治主張，但就冇機會當選，亦希望泛民有份通過方案。所以如果泛民玩杯葛，成齣戲就冇咁好睇。
學者指可令中央尷尬
該學者認為，短期退出議會係令中央原定劇本無法以最理想嘅模式演落去，當泛民退出議會後，立法會官方記錄通過方案就唔會有佢哋參與，會令中央尷尬喎。
泛民短期退出議會，同時要諗擔當反對派所為何事，點樣持久作戰，以及泛民仲係咪一班珍惜自由及民主嘅選民首選，相信此舉可令泛民真正從烈火中重生，為長期鬥爭做好準備。
梁耀忠：唔使咁迂迴
我哋問過多名泛民議員，民主黨胡志偉就話佢哋經選民授權，如果市民支持「袋住先」，咪喺一六年投票畀建制派，等佢哋有三分之二票通過政改，到時咪見真章囉。街工梁耀忠亦直指提議係「披住羊皮呃人」，有訴求就直接啲，唔使咁迂迴曲折。連支持總辭嘅人力陳志全都話建議係扮激進，講明佢哋係想投票反對政改方案。
不過，都唔係所有人都反對建議，好似社民連「長毛」梁國雄坦言呢個係好機會，等泛民總結機會，更新理念同策略，但就希望泛民要集合民間支持力量。新民主同盟范國威亦指，作為策略係有得諗，又指○九年早有人提過。不過，最終泛民係豁出去，定係戀棧權位，時間就可證明一切喇！