中環出更：雙「陳」重遇 回顧航情
日前馬會大董葉澍堃（Stephen）趁跑馬日在快活谷宴請百仁基金成員，基金主席李文俊臨時因公務急飛重慶，所以由包括佢胞弟李文斌在內嘅幾位副主席及會員出席。期間基金副主席陳稼晉（Patrick）巧遇馬會大董陳南祿（Philip），看來兩人好熟落，原來Patrick曾經任職國泰航空機師，同做過國泰高層嘅Philip係舊同事，難怪兩人咁好傾喇。
Patrick盛讚Philip係好老闆，事關○三年沙士爆發時航空業一片蕭條，Philip當時經常約會唔同機師閒話家常，一來安撫人心，二來聽取意見，當年Patrick有份獲約見，仲咁啱坐喺Philip隔籬，所以留低深刻印象。
引擎失靈 稼晉九霄驚魂
講起做機師嘅經歷，Patrick話最難忘係有次出勤時，航機起飛冇耐就發現引擎失靈，於是向控制塔發出求救訊號，好彩最終有驚無險在目的地機場安全降落。嗰次係佢首次親口講出求救訊號，所以畢生難忘。
講番當晚飯局，出席嘅仲有基金副主席陳寧寧、羅詠詩、廖宇軒及國際小母牛香港分會籌款委員會成員張詩培等人。Stephen話，今次請客係因為好開心獲邀擔任百仁基金旗下獎學金嘅評審委員，希望日後多啲同呢班熱心嘅年輕企業家交流做善事心得。期間眾人一邊閒談一邊投注，仲問Stephen攞貼士，但最終都係鋪晒草皮。
卓妮