渡海濠情:分手派對 開心有趣 

美國有酒店嘅宴會廳一貫做開結婚派對,但見離婚嘅人多過結婚,於是推出離婚派對套餐,夫妻舉行離婚簽字儀式後,一人一間廳畀佢哋開派對各自慶祝,係咪好貼心呢?嚟自金池桑拿嘅金梓就話:「我估分手派對都有得諗!」

宣告單身

金梓話:「我咁年輕,諗都未諗過結婚,更唔好話離婚,所以離婚派對對我嚟講,真係遙不可及嘅事,但既然有人搞得離婚派對,咁分手派對亦一樣大有市場!講起分手,我嘅分手經驗可以話多不勝數,但每次失戀都要向朋友解釋,又真係幾麻煩,所以計我話一於搞個分手派對,約齊大班朋友,向佢哋一次過宣布,我分手啦!朋友們一次過知道晒,唔使逐個通知,之後齊齊飲杯祝賀好定係安慰好,一定會好好玩,而且場面仲會好感人添,認識個衰佬嘅,仲可以齊齊上台唱衰個前度,絕對係大快人心嘅事。除咗昭告天下等所有朋友知道我分手之外,仲可以向啲未婚異性表明,我已經回復單身,接受任何人嘅追求,話唔定當晚就有新發展啦!所以分手派對真係有得諗!」

咪叫阿嫂

咁會唔會叫埋個前度嚟呢?金梓話:「呢層真係要諗吓,如果大家和平分手,我唔介意叫埋佢嚟玩,最低限度佢都可以夾番份錢吖嘛!而且多埋佢班朋友嚟見證,唔使第日行行吓街,有人走過嚟阿嫂前,阿嫂後!自己一個都好哋哋,如果新男友喺旁邊,畀佢啲豬朋狗友嫂前嫂後咁叫,你話幾尷尬呢?所以拉埋佢哋朋友嚟一次過講清楚以後冇瓜冇葛,見面唔好再叫阿嫂,真係方便好多。但如果係唔開心分手嘅,我覺得真係咪見面好!否則開開心心嘅派對轉眼變為戰場就唔好啦!到時男女雙方大混戰,第二日唔上頭條都幾難,所以都係咪制。另外,仲有一啲喜歡死纏爛打嘅前度,我都免得叫佢哋嚟,因為到時哭哭啼啼要求復合就失禮死人啦!所以搵前度嚟真係要諗過!」

金梓Profile  

年齡:21歲

三圍:34-23-34

撰文:小德 

攝影:阿生