行會召集人林煥光公開表示「電視發牌決策與公眾期望存在過大落差，特首應作深切檢討」，呢句話引來無數回響，有炮轟佢忽然正義，佢身為行會召集人，而電視發牌乃特首會同行政會議集體決定，何以佢變身時事評論員，單嘢好似完全唔關佢事咁款！
林煥光的言論，明顯令特首尷尬，更嚴重損害政府施政的威信；一言既出，負面的批評排山倒海而來，林煥光迫於形勢，只好連忙澄清，說並非針對特首而是針對「過程」。然而，這會否太遲？政治家都懂得「民信」的重要，你又要威又要戴頭盔，做婊子又想要貞節牌坊，你叫人如何分得清你係忠定係奸，老朽真誠叫周一鑊為你再獻唱《難為正邪定分界》！
香港呢個畸形政治生態，除了有「忽然民主」嘅陳四萬，如今又多了個「忽然正義」嘅林煥光！佢忽然又龜縮話自己嘅言論唔係針對特首，只係「針對過程」，好嘞，老朽亦都想知佢喺整個「參與」討論過程，有無力諫特首要發三個牌？有冇以道不同不相為謀劈炮話唔撈啊？若然有，佢講嘅說話自然有光環，如冇，佢就係如假包換嘅抽水王！睇佢從政，出來行，唯一嘅規則，就係沒有規則！
阿哥，唔係清流就唔好扮正氣凜然，好似最近汪峰八百九十二字向章子怡示愛，被網民踢爆章子怡收到的告白，全是二手貨，汪峰兩年前就曾在演唱會上以一首寫給已故戀人筠子的《當我想你的時候》向第二任前妻康作如示愛，現在依樣畫葫蘆，又把寫給模特兒葛薈婕的《我是如此愛你》獻給章子怡……
汪峰扮得成情聖嗎？歌迷贈興給了一對聯，上聯：一對新夫妻，下聯：兩台破機器，橫批：再接再離。老朽聯而想之，林煥光還扮得成忠貞之士嗎？民信破產，與其再接再離，不如歸去。