運輸運輸，連運都輸，運輸署睇怕注定係一個非常失敗嘅政府部門，好難有機會鴻運當頭。
運輸署有幾失敗？不妨聽聽申訴專員公署點樣講。申訴專員黎年話呀，公署不時接獲市民投訴，運輸署冇妥善監管專營巴士公司嘅運作，以致部分巴士路線經常有班次失準，或者脫班嘅情況出現。根據運輸署提供嘅資料顯示，過去兩年運輸署透過不同渠道，每年接獲約二千宗有關專營巴士服務班次失準、脫班或延誤嘅投訴。所以咯喎，申訴專員公署認為運輸署監察機制似乎不完全奏效，回應市民投訴有改善空間，有必要詳細調查。
專營巴士除咗班次失準或者脫班之外，更加被傳媒發現有「鬼巴」於路上空車行駛，假扮載客務求喺班次之上「篤數」，申訴專員公署決定主動調查之餘，亦歡迎市民喺下月十六日或之前提出意見。
呢嗱嗱嗱，你話運輸署係咪失敗吖？監管專營巴士搞到甩頭甩髻，家陣要驚動港產青天大老爺出面調查，為千千萬萬嘅巴士乘客討回公道。你知啦，搭得巴士都唔會大富大貴，通常係收入相對微薄嘅打工仔，萬一因為巴士脫班而遲大到，激到無良僱主一聲令下炒魷魚，條數點計先？若然碰啱仔細老婆嫩，唔通走去巴士公司追討奶粉錢咩？定係走去運輸署要求新紮署長楊何蓓茵養起自己一家大細？萬一痛失飯碗而冇仇報，嗰種有冤無路訴嘅苦情隨時導致六月飛霜o架！
申訴專員黎年係功夫茶少數覺得比較順眼嘅官員，無他嘅，一經專員深入調查，庸官劣吏無所遁形。大家記唔記得亂七八糟嘅僭建風暴呀？最初就係因為黎年秉公辦理，踢爆特區政府各大部門長期唔處理村屋僭建問題，所以就星火燎原再火燒連環船，連過氣特首曾蔭權以及敗選特首唐英年都被揭發係知法犯法嘅僭建業主。
所以咯喎，黎年一話要主動調查運輸署，功夫茶即刻產生一個直覺，本來冇乜幾多人噏得出名嘅楊何蓓茵，將會變得街知巷聞。事關調查過後少不免要搵人企定定孭鑊，冇理由搵個二打六硬食啫，當然要大姐大親自受靶。到時攝影記者嘅相機閃呀閃，呢一位新官上任冇幾耐嘅署長想唔出名都難啦。
啱o架喇，冇錯o架，申訴專員真係應該嚴格調查運輸署，睇下因乜事幹監管咁失敗。喂，巴士脫班無王管，淨係識得加價，唔查點得呀！
總而言之，巴士唔可以脫班，監管唔可以脫節。若然查得出邊個係罪魁禍首，功夫茶懇求港產青天大老爺，千祈唔好畀佢脫罪呀！