功夫茶溫馨提示：萬聖節將至，喜愛夜蒲嘅人士，狂歡之餘千祈要小心，因住樂極生悲吖！
唔係想掃大家興，而係想提點大家打醒十二分精神，事關國際著名旅遊蒲點中環蘭桂坊一帶治安惡化，罪案無奇不有，數字不斷上升，一個唔好彩，隨時夜蒲變夜悲，咁就該煨咯。
蘭桂坊治安究竟惡化成點？呢，警方數字顯示，今年首八個月罪案達三百一十九宗，已遠超去年全年數字，當中盜竊、刑事毀壞、打鬥、非禮及襲警等罪案均較去年全年多出逾一成至逾六成不等。呢個數字已經夠可怕嘅喇，有區議員指真實情況仲嚴重得多，由於警方打擊不力，執法不嚴，呢啲可能只係冰山一角嘅咋。
正所謂，冰凍三尺非一日之寒，蘭桂坊淪落到九反之地，唔係一朝一夕嘅事。今年七、八月，《東方日報》及《太陽報》先後直擊報道，揭發蘭桂坊治安不靖淪為罪惡溫床，唔單止有南亞裔黑幫入侵，北妹流鶯進駐賣淫更係日益猖獗，甚至有不法之徒公然兜售毒品及超級迷姦水等，簡直無法無天。
黑幫無法無天，搞到蘭桂坊烏煙瘴氣，唔通當局無動於衷？警方係咁講嘅，舊年喺蘭桂坊一帶進行咗一千三百次巡查行動，較一○年增加六成七，而今年首八個月亦已進行逾一千次巡查行動。可惜吖，警方巡查得愈密，蘭桂坊罪案就愈多，都唔知佢哋究竟點樣巡查嘅。更離奇嘅係，近年連襲警案都多咗添，差人自身難保咯喎，又點樣維持治安喎！
仲有一樣嘢功夫茶諗極都唔明，警方公布嘅罪案入面，竟然無強姦案，你信唔信吖？喺通街醉娃、迷姦水橫行嘅蘭桂坊，點解有非禮案而無強姦案？唔通啲色魔咁有良心？其實唔係無強姦案，而係強姦案數字「被隱瞞」。有關注團體踢爆，過去曾接到唔少強姦個案，由於受害者覺得報警都無用，所以只好啞忍。
有人話，唔知係咪因為老蘭係旅遊熱點，警方巡查嘅時候都會鬆手啲，費事阻住人哋做生意喎。如果真係咁，就大錯特錯嘞。試諗吓，旅遊熱點淪為罪惡溫床，香港仲有乜嘢形象可言？又點樣成為旅遊之都呢？人哋外國嘅酒吧街大多秩序井然，治安良好，人來人往，相安無事，而香港連一個蘭桂坊都搞到烏煙瘴氣，亂象叢生，簡直失禮死人。
嗱，咪話功夫茶唔提醒，蘭桂坊除咗係罪惡溫床，亦曾經發生人踩人慘劇，萬聖節及聖誕節就快到喇，如果當局仲唔加強執法，整頓秩序，遲早又爆大鑊嘅咋！