又——冧——樹——喇！小——心——啲——呀！
如果真係有人咁樣提醒大家，就唔使驚冧樹大禍臨頭啦。奈何世事呢家嘢，邊有咁多提醒吖，一棵大樹砰嘭一嘢仆落街，避又冇得避，閃又唔識閃，冬瓜豆腐三長兩短死咗都唔知發生乜嘢事。
呢嗱嗱嗱，冧樹殺人事件再次重演嘞，今次嘅事發地點係大埔林村一帶，仲係一死一傷添。尋日朝早十點左右，有一架貨車由大埔塘上村駛出林錦公路，忽然之間斜坡上面一棵十五米高嘅大樹塌下，貨車當堂被壓至嚴重損毀。結果咯喎，有位乘客重傷被困車內，消防員用咗粒幾鐘先至能夠鋸走樹幹抬出傷者，可惜最終送院搶救都係不治身亡。至於貨車司機，亦都受傷送院，好彩情況穩定。
點解會冧樹嘅呢？樹木專家歐永森現場視察過之後就話嘞，冧嘅嗰棵樹係細葉榕，相信倒塌原因係樹木結構出現問題。歐永森解釋，呢棵樹出現分枝大過主幹嘅情況，行內稱為「樹包皮」，相信呢個現象已經持續十年或以上，平時如果經常檢查，透過目視都可以見到相關情況，只要將分枝剪短或者用繩纜拉穩主幹，倒塌係可以避免嘅。
講到呢度，又係時候訪問一下樹木辦班官僚。喂喂喂，樹木辦呀樹木辦，乜你哋嘅工作範圍唔係包括經常檢查全港樹木嘅咩？如果有檢查，因乜事幹冇發現潛在危險呀？如果冇檢查，又因乜事幹懶得咁交關呢？
樹木辦最初之所以橫空出世，原因係赤柱有一棵刺桐冧咗落嚟殺死一位女大學生，政府事後孔明急忙補鑊，由當時嘅政務司司長唐英年擔正大旗左研究右研究，終於開設樹木辦，顧名思義就係管理樹木以防慘劇再次發生。點知樹木辦成立冇幾耐，一○年沙田圓洲角就有大樹倒冧壓死途人，而尋日又有人死於非命，樹木辦係咪玩忽職守呀？
地政總署署長甯漢豪講得好好笑，佢話喎，由於幾年來都冇人投訴出事嗰一棵樹，所以一直冇巡查過。功夫茶想請教甯署長，無端白事點會有人無無聊聊走去投訴一棵樹嘅呢？與其投訴一棵樹，不如直接投訴甯署長仲好啦。不如咁嘞，功夫茶家陣就投訴甯漢豪，首先投訴閣下偷懶，其次投訴閣下亂噏，麻煩立即展開調查！
嗱，人命關天呀，真係要徹底調查有冇懶到出汁嘅官僚失職。正所謂咯喎，我不殺伯仁，伯仁因我而死。家陣情況係，你不殺路人，路人因你而亡。冧樹殺人慘劇不斷，今次仲釀成一死一傷喎，咁大件事唔查唔得啦，吓話？
講真吖，即使好彩冇死人，冧樹都大吉利是啦。開講都有話，樹倒猢猻散，冧樹象徵冧檔，樹木辦都唔想特區政府冧檔而連累自己烏紗不保啩。