港鐵剛剛公布中期業績，一如以往賺大錢。然而，像港鐵這樣年年賺錢卻年年加價。「東方報業民意調查」顯示，對於港鐵賺大錢（上半年賺逾五十八億元）仍可申請加價，三成七受訪者直指可加可減機制漏洞百出，有加無減。
老朽對數字向來麻木，只知港鐵賺大錢，要加價時都好似好委屈。基於條例，唔加就好似犯咗法，唔跟規矩咁款，真係難為嗰位公關經理出來扮家嫂咯！
「可加可減」機制，據悉係香港一種監管公營服務機構嘅收費機制而訂立的機制，藉以限制公營機構加價的幅度，並要求在通縮時下調收費。
事實係本港樓價屢創新高，帶動租金年年上揚，喺咁嘅情形下，有乜可能會有「通縮」呢？「可加可減」之所以荒謬，就係通脹率愈高，咁港鐵加幅則可愈大！換言之，市民大眾承受通脹之苦愈重，港鐵即使賺到爆燈，依然能夠「理直氣壯」賺取更高的票價，如此這般「可加不可減」的「畸制」合理嗎？
老朽想起有論者指，每天有多少人在義憤填膺地指摘批評、嘲諷社會的黑暗、人性的卑劣、體制的不公。可是，往往就是同一批人，又總在現實生活中，不以為忤地靠近着那些黑暗、發揚着那些卑劣、利用着那些不公，並從中獲益。
新政府成日話「急市民所急」，又強調「民生無小事」，咁就唔該攞啲正能量出嚟，將盤據咗咁多年嘅「可加不可減」的「畸制」徹底粉碎，唔好年年畀港鐵出來大加票價，仲要講到咁委屈啦，前世！