九月開學對於好多小朋友而言係一件非常開心嘅事情，既可以讀書識字，又可以交朋結友，不知幾鬼死開心。之不過咁，有利往往就有弊，事關通貨膨脹係一隻隱形老虎，百物騰貴隨時一啖吞咗你落肚。
開學等於使錢，一講到使錢家長就頭痛到爆。你知啦，買課本要錢，買校服要錢，買午餐要錢，如果冇錢你都咪使旨意求學上進做個讀書人。聖雅各福群會做過一項調查，為咗應付學生哥開學，家長嘅負擔愈來愈沉重。
調查結果顯示，兩成半受訪家長為每名子女準備開學嘅支出係三千至四千元；兩成四嘅支出係四千至六千元；一成人嘅支出高達六千至一萬元。八成受訪家長話呀，今年子女開學支出較去年增加，當中三成二表示加幅兩成，約一成表示開支上升四至六成。六成半受訪家長仲話，子女開學支出佔家庭總收入兩成或以上。
喂，一個家庭要動用總收入兩成應付子女開學，唔講得笑o架，確係好惡頂。萬一閣下好不幸係低收入人士，每個月攞緊最低工資，供書教學自然係苦上加苦。正如油尖旺區家長教師會聯會會長李偲嫣話齋，新學年家長面對各項加幅，包括校巴收費加價約一成，補習收費亦加價一成至兩成，家長人工升幅又追唔上通脹，經濟負擔沉重。
所以話啫，新政府真係任重而道遠，有必要切切實實破舊立新，唔可以放任舊政府嘅遺禍延續落去。譬如話，唔可以容許樓價不斷泡沫化，又譬如話，唔可以任得租金長升長有。大家心照不宣啦，住屋支出佔咗香港人好大比例嘅收入，剩番雞碎咁多嘅血汗錢，點樣為子女供書教學呀！
普通收入人士已經捉襟見肘，若然係收入低微嘅草根階層，情況更加係七個蓋冚唔到十個樽。香港嘅貧富懸殊非常嚴重，舊年堅尼系數已經升至零點五三七，遠高於零點四嘅警戒線，創出四十年新高。樂施會認為，上屆政府扶貧不力，前扶貧委員會有四大不足之處，係加劇貧富懸殊嘅主要原因。四大不足包括冇訂立貧窮線及減貧目標、扶貧措施零散、缺乏諮詢機制同埋統籌不力。
現屆政府晨咁早就話要恢復扶貧委員會，仲要由特首梁振英親自揸旗添，有乜嘢實際做法呀？講真吖，唔知喎，只係知道有個籌備小組，近日開始接見各界人士聽取意見，就係咁多嘞。
計功夫茶話齋，窮等人家脫貧嘅最佳辦法就係讀書，如果小朋友細細個冇機會讀書，長大成人就冇辦法脫貧。梁特首呀梁特首，通脹玩殘學生哥，扶貧不力實坎坷，唔該做嘢啦！