如果你頭暈身走去睇醫生，一坐低，見到醫生眼腫腳浮，手震口震，睇個樣似乎仲病過你，你會點呢？唔使問阿桂，梗係即刻起身走人啦。
嗱嗱嗱，咪以為以上情節好誇張呀，其實呢種荒誕情景喺本港公立醫院幾乎日日上演緊。《香港醫學雜誌》發表調查報告，指超過三成受訪醫生工作壓力瀕臨爆煲，達到極度勞累水平，病徵包括情緒疲勞、人格失常、精神繃緊至心力交瘁等等；其中一成人仲因為頂唔順壓力，曾經諗過自殺添。唉，能醫不自醫，醫生成為醫療亂象受害者，唔知可笑定可悲。
其實，公立醫院人手長期嚴重不足，醫生、護士工作壓力瀕臨爆煲，已經唔係新聞，只係估唔到醫生嘅苦況會慘到咁嘅地步。話時話，三成醫生極度勞累，聽見都恐怖，試諗諗，一個醫生喺極度勞累狀態之下同病人開刀做手術，會有乜嘢後果呢？容乜易切小腸變成切大腸？割左眼變成割右眼o架？
唔係嚇你，公立醫院醫療事故無日無之，無奇不有，過去真係試過有病人左眼做手術，醫生竟然將麻醉藥注射入右眼。至於其他悲劇更加層出不窮，打錯針又有，開錯藥又有，輸錯血又有，割錯器官都有……大家都知啦，喺渾渾噩噩嘅食衞局局長周一嶽執掌之下，醫療系統百病叢生，亂晒大龍，唔係醫護人手不足，就係醫生極度勞累，醫療事故咪好似「痛心特首」曾蔭權嘅貪腐醜聞一樣，長爆長有，愈爆愈臭囉！
嗱，周一鑊係醫療系統千瘡百孔嘅罪魁禍首，已經係人所共知嘅事實。有團體尋日去新政府總部請願，狠批港府過去七年醫療政策嚴重失誤，犯下「十宗罪」，好似監管私家醫院不力、公立醫院聯網資源分配不均、醫護人手流失嚴重等等。團體負責人直斥，煲呔曾同周一鑊就係醫療政策流弊百出嘅幕後兇手！
講開又講，周一鑊真係害人不淺o架，醫護荒講咗N咁多年，前線醫護早就嗌晒救命，佢身為醫療政策總舵手，居然一直闊佬懶理，關人個關。結果搞到醫療服務質素每況愈下，而醫療事故就不斷上升，害苦病人、害慘醫護、害死成個醫療體系。一句講晒，醫生極度勞累、市民極度無奈、醫療極度混亂，皆因周一鑊極度無能！
可以咁講，如果周一鑊繼續留喺港府，唔好話極度勞累嘅苦命醫生萌生自殺念頭，好多市民可能都有咁嘅念頭呀。令人極度沮喪嘅係，港府即將換屆，居然有傳聞指周一鑊可能會調任勞工及福利局局長，簡直係同全港市民開玩笑。功夫茶奉勸周一鑊一句，七月一日跟埋煲呔曾自動消失啦，日日被市民炮轟，你唔覺得極度勞累嘅咩！