功夫茶對上一次搭飛機，係大半年前。作為正正常常香港人，相信一年搭兩次飛機左右係最普遍嘅。偏偏有一個高官，唔知係患咗飛行強迫症吖，定係覺得空中小姐別具韻味，十分熱衷於飛來飛去，幾乎可以封佢做「官場空中少爺」。
呢個高官係邊個呢？之唔係素有離岸特首之稱嘅曾蔭權囉，佢嘅飛行紀錄好巴閉o架，幾乎拍得住一隻冇腳嘅雀仔。先講飛來飛去用咗幾多納稅人奉獻嘅公帑吖，根據當局嘅數字，○七年七月至一二年一月期間，行政長官連同隨行人員公務外訪嘅開支總額係一千零六十七萬元。如果只係計算任內最後一年更加得人驚，開支總額係四百四十六萬元。
嗱，大家不妨計一計數，曾蔭權上任頭四年，平均一年嘅外訪開支係一百萬多啲，因乜事幹去到最後一年就變咗四百幾萬呢？計功夫茶話齋，佢有名你叫貪曾，貪遍海陸空絕不手軟，當然要利用任內最後機會攞着數啦，一來周遊列國當遊埠，二來可以換取飛行里數獎賞吖嘛。
講完公帑開支，講講外訪次數。煲呔曾○七年上任至今，五年來外訪五十四次，足迹遍及英國、美國、澳洲、印度、科威特以及沙特阿拉伯等等。喂，平均一年外訪十一次咁滯，差不多一個月飛一次，你估特區政府行政長官係旅遊大使咩？有冇必要離岸作業得咁頻密呀？
外訪得多自然里數驚人，五年累積超過三十四萬飛行里數。你知啦，飛行里數係可以換機票o架，假如全數落袋私有化，曾蔭權足足可以換取十一張香港來回北京或者東京嘅經濟客位機票，卸任之後繼續可以飛來飛去，免費嘅。
問題係，貪曾到底有冇將飛行里數私有化呢？本報記者當然秉持求真精神向特首辦公室問個清楚明白啦，可惜吖，特首辦含糊其詞，冇講清楚煲呔會否留待卸任後化作私人用途。城大專業進修學院學術統籌宋立功講得啱呀，曾蔭權公幹賺取嘅飛行里數係公眾利益一部分，公眾有知情權，特首辦冇清楚交代係為咗隱瞞實情。
講真，功夫茶以及大多數香港人對於貪曾已經不存幻想，你話佢冇將飛行里數私有化，搵鬼信咩！
貪心呢家嘢，確係人性弱點，而且會上癮o架。既然廉署已經展開調查，睇睇貪曾接受富豪一連串奢華款待有冇違反防賄條例，功夫茶建議，不如順便查一查飛行里數私有化是否構成貪污瀆職，畢竟牽涉公帑，咁嘅做法同穿櫃桶底冇乜分別嘅咋。
離岸特首貪到盡，貪到最後一分鐘，納稅人個個做咗冤大頭，唔知即將來臨嘅六月會唔會飛霜呢？