考考大家，「不該」普通話點樣發音？冇錯嘞，近似英文Poor Guy。今日功夫茶同大家講講非常不該嘅Poor Guy古仔。
第一個Poor Guy叫曾蔭權，呢一個未做離岸特首貪遍海陸空嘅高官，○二年出任政務司司長。當時嘅曾司長負責人口政策，○四年收緊申領綜援同生果金嘅資格，規定申請者必須居港滿七年，提出申請前必須連續居港滿一年，期間離港不超過五十六日。雖然引起社會各方不滿，普遍認為呢一個政策歧視新移民，甚至有違《基本法》，不過笑罵由人嘅曾蔭權一於少理。
第二個Poor Guy就係社會福利署，署方做咗一件鬼鬼祟祟嘅虧心事。有一個名為游文輝嘅香港人，○六年長駐廣東工作，○八年慘遭辭退返港，同年十二月申領綜援，但因為不符合連續居港滿一年嘅規定而被拒。游文輝○九年入稟高等法院司法覆核，一○年法院裁定相關政策違憲，將永久居民分類造成歧視，所以下令撤銷。打輸官司嘅社署提出上訴，今年二月被上訴庭駁回。
本來呢，社署有權再上訴至終審法院，但係徵詢過律政司意見之後，社署決定放棄再上訴。換句說話嚟講，對於申領綜援必須連續居港滿一年嘅違憲苛政，社署以放棄上訴嘅形式撤銷咗。問題係，社署居然秘而不宣，靜雞雞冇對外公布呢一個改變咗嘅政策，你話係咪鬼鬼祟祟吖！
咦，功夫茶諗起一個人，前特首董建華講過「唔提就唔存在」，莫非社署繼承老董遺風，綜援苛政隻字不提就等於不再存在？
所以話啫，曾蔭權同社署呢兩個Poor Guy真係好不該，先係「無中生有」搞出一個違憲嘅離港限制，繼而「有中變無」粒聲唔出撤銷咗。難怪香港社區組織協會批評，社署唔公布撤銷相關限制等同剝削市民知情權以及申請權，估計受影響人士超過一萬名。
講到剝削市民知情權，呢家嘢大概係特區政府另一個秘而不宣嘅鬼祟政策。大家睇下警方點樣箝制新聞自由吖，一方面利用數碼通訊系統迫使傳媒冇辦法再聽機收風，另一方面又選擇性發放突發消息，數量更加係少得可憐。至於設立「核心保安區」之類嘅種種限制，亦係剝削市民知情權嘅表現，因為記者一早已被拒諸門外。
計功夫茶話齋，既然申領綜援必須連續居港滿一年嘅限制係違憲，申領生果金以及傷殘津貼嘅相關限制亦係違憲，點解唔一齊撤銷呢？好心社署唔好繼續做Poor Guy啦，眼冤㗎！