嗱，功夫茶唔係教大家犯罪，之但係假如閣下有病，病態到非要犯罪不可，例如上網成癖一定要睇鹹片或者賭外圍，有一個地方非常適合，犯罪之後好大機會甩身。乜嘢地方咁巴閉呀？咪就係康樂及文化事務署轄下嘅公共圖書館囉！
大家唔好以為去圖書館犯罪係天方夜譚，皆因康文署嘅管理好粗疏，話就話有電腦資訊過濾系統，不過呢一條防線十分脆弱，好多色情同賭博網站都一覽無遺。你知啦，圖書館用家以青少年居多，一個唔覺意就會學壞。
本報記者以本地二十個色情網站進行測試，發覺四分之一都冇受到電腦過濾系統攔截，喺圖書館成功登入並且瀏覽。記者再以智能手機連接圖書館無線網絡，同樣發現過濾系統無法阻擋相關網站。
換言之，你去到圖書館完全係可以做一條鹹蟲o架，任由大量狀似瓜瓜果果嘅物體映入眼簾。當然啦，功夫茶勸大家唔好過分沉迷於虛無縹緲嘅性幻想，更加唔好當眾做出慾火焚身嘅猥褻行為，以免害到自己身敗名裂。曾經有一個環保署高官，日日返工利用一半時間上鹹網，結果東窗事發搞到前途盡毀，本來月薪超過十萬大元o架，冇陰功！
至於賭博網站，圖書館嘅過濾能力亦係似有還無，小朋友讀讀下書悶到抽筋，隨時可以向外圍莊家投注，賭下波又得，賭下馬又得。如果係咁做，唔止道德上犯罪，仲係實際上犯法，因為外圍賭博不論收受或投注皆觸犯法例。任何人如向收受賭注者下注，不論境內或境外，最高可被判監九個月及罰款港幣三萬元。冇耐前之嘛，一名馬評人被警方拘捕，電腦之中搵到向外圍投注嘅證據，最終被判罰款三千五百元。
喺圖書館咁嘅公眾地方違例賭博話就話好大機會甩身啫，之不過咁喎，天網恢恢疏而不漏，警方追查起上嚟，亦都可以透過圖書館紀錄捉到人o架。
圖書館因乜事幹容許網絡犯罪呀？點解淪為「黃賭集中營」呀？康文署發言人話喎，電腦過濾軟件由承辦商不時更新資料，如果職員發現或收到市民通知有漏洞，會與承辦商安排過濾。亦即係話，康文署將監管嘅把關責任同時外判咗咯，呢家嘢係官場中人最流行嘅卸膊神功。
唉，好心康文署唔好誤人子弟啦，推卸責任雖然係習慣成自然，不過都可以嘗試戒一戒。人哋戒賭都有成功例子，官僚戒懶未必一定失敗o架。咁啦，功夫茶向未來特首梁振英提出一個要求，如果圖書館繼續無法過濾不良網站，政府就有必要過濾康文署嘅劣質官僚！