咦，過癮喎，如果功夫茶狠下心腸去欺騙政府，自稱經營非牟利團體，係咪可以象徵式交一元租金就可以使用一大塊土地呢？你知啦，做官嗰一班友仔，有時好鬼死蠢㗎，甚至係懶到出汁，傻更更被呃咗可能都懵然不知。
呢嗱嗱嗱，唔係功夫茶憑空想像㗎，申訴專員公署有實際個案提供。公署發表報告指出，地政總署現有五百七十幾塊地皮，都以一元象徵式租金租畀非牟利團體，之不過咁，地政總署嘅監管就好有問題嘞。申訴專員發現，署方並無就非牟利性質嘅短期租約申請，作出合理審批、續期以及監管，又冇訂立周全機制同程序。由於監管不力，署方轄下分區地政處同決定收取象徵式租金嘅決策部門各自為政，甚至互相卸責。分區地政處冇定期視察有關土地，令部分出租土地被濫用，例如長期荒廢，或者被租戶用於牟利事業。
有一個實際個案係咁嘅，一個辦學團體九四年租地經營非牟利小學，到九九年學校改名，地政總署接到投訴話小學轉為牟利用途，辦學團體當然否認啦，地政總署竟然算數冇再追問。多年來繼續有人投訴，直至一○年先至停止以象徵式一元出租，學校要繳交每年四十萬元巿值租金。地政總署話喎，唔肯定學校幾時開始賺錢，所以冇追討之前嘅租金。
喂，問又唔問，查又唔查，有人投訴都只係採取慢動作龜速行動，你話呢一個係咪「容易受騙的政府」吖？
另外又有個案，有團體九三年以一元租地話要主辦戒毒中心，地政總署九六年巡查發現土地原封不動，官老爺懶懶閒置之不理。直至一○年署方先至施施然收回土地，令到呢一塊地皮荒廢咗十七年。
十七年啊十七年，人生有幾多個十七年？政府身為香港最大地主，即使庫房大把錢，都冇理由咁敗家啫，一來浪費土地資源，二來十七年冇收市值租金等同浪費公帑。
計功夫茶話齋，問題唔係象徵式租金，問題出於象徵式管治。大家睇睇吖，曾蔭權班子執政七年，有乜嘢唔係象徵式㗎？最明顯嘅係所謂約束特首嘅防貪規矩，徹頭徹尾就係象徵式，連文本紀錄都冇，純粹係無字天書呀，該煨！
最大嗰個都冇規冇矩咯喎，做細嘅自然頻頻失控，返工象徵式，巡查象徵式，執勤象徵式。地政總署象徵式監管非牟利團體嘅象徵式租地，毫無疑問係冰山一角，類似情況肯定多如牛毛。
所以話啫，對於曾蔭權政府冇必要再心存幻想，將一切希望寄託於下屆政府。梁振英呀梁振英，閣下嘅選舉承諾睇怕唔係象徵式啩？