「五十年不變」，係鄧小平對港人嘅承諾，佢所指嘅係香港實行一國兩制嘅期限。但唔知係港產官僚會錯意呀，定係詐傻扮懵，佢哋真係乜都唔理，乜都唔變。呢，有間幼稚園違規經營五十年，教育局同地政總署竟然一直闊佬懶理，關人個關。
事情係咁嘅。位於赤柱東頭灣道一號嘅聖德蘭幼稚園，辦學團體兼地段業權人係天主教香港教區，聲稱係非牟利幼稚園喎。呢啲都冇乜特別，特別在於教育局註冊資料顯示，教區一九六二年只係申請舉辦小學，地契亦規定該地段用途僅限於「教堂及非牟利小學」，並唔包括幼稚園，但事實上該幼稚園已經存在咗五十年，即係足足違規經營半世紀，問你服未！
本報記者仲發現，該小學去年九月已經停辦，而幼稚園就繼續經營，而且一年學費接近四萬元，絕對稱得上係富貴幼稚園，所謂非牟利，根本係呃鬼食豆腐。天主教區話喎，小學停辦後，佢哋計劃將空置校舍擴建為幼稚園用途，先至發現有問題，於是即時向地政總署申請豁免書。而地政總署就大耍太極，聲稱正諮詢有關部門及教育局政策上嘅支持，暫時未知是否批准豁免。至於教育局就更加敷衍，話正向地政總署跟進云云。
咁就好笑喇，呢間幼稚園違規經營五十年，地政總署同教育局一直矇查查，如果唔係本報踢爆，佢哋依家可能仲發緊夢，你話幾咁混帳吖。所以呢，佢哋無謂再互相推莊、互相卸膊喇，雙方其實都有責任，如果要懲罰，呢班官僚應該各打五十大板至啱。
正如幼稚園校長所講，九八年校方曾向教育局申請轉名續辦，當時教育局並無質疑，照批不誤，咁咪即係變相承認呢間幼稚園冇問題囉。港產官僚渾渾噩噩，教育局係又批唔係又批，而地政總署就對違反地契規定視而不見，咁唔係失職又係乜吖？
講到失職，講到違規經營，又點止一單咁少吖。好似元朗大棠荔枝山莊咁，經營者霸佔官地十八年，地政總署一直當睇唔到，直到審計署踢爆先急急補鑊。嗱，尋日係清拆最後限期，居然仲有大量僭建物未拆，擺明當港府冇到喇。難為地政總署仲死雞撐飯蓋，聲稱係咪提出檢控，正諮詢法律意見喎，真係唔知好嬲定好笑！
唉，冇法子喇，上樑不正下樑歪吖嘛。煲呔曾歎到最後一分一秒，手下有樣學樣，胡混到最後一分一秒又有乜奇怪吖。所以，大家唔好鬧立法會議員拉布，其實成個政府一直喺度拉緊布！