探射燈：貪曾不法辦 百萬人上街
曾蔭權黐富豪到澳門及海外食住玩、平租半億人民幣深圳豪宅作「禮賓府」，貪盡海陸空事件被東方報業集團獨家踢爆後，激發社會各界群起怒吼，掀起一浪接一浪的倒曾浪潮，全城鬧爆「曾商勾結」！而曾蔭權事發至今一直龜縮，未肯親身向公眾清楚交代事件，更令民怨民憤飆升。ontv評論台特備節目「就係敢講」，昨日請來立法會議員陳偉業、梁國雄及香港城市大學專業進修學院學術統籌宋立功評論事件，三人一致認為曾蔭權一定要下台才能平息民憤。但下台不代表他可以就此「甩難」，有關方面應繼續對他展開涉貪調查，令事件水落石出。他們指出，若中央不正視和處理，勢必引發過百萬人上街遊行，抗貪到底！
特首下台之路六大拆解：嚴重違操守 須引咎辭職
Q1 曾蔭權嚴重違反公職人員操守，是否需要向市民交代，甚至引咎辭職？
陳偉業：佢貪盡海陸空，歎勻省港澳，特首可以咁貪各種享受，係好難令人接受，可以話係極為無恥，亦都好無良知，如果佢仍然有些少自愧之心嘅話，其實應該立即鞠躬落台，如果唔係跟住落嚟嘅逼供，只會令其醜態顯露無遺。
宋立功：香港政府賴以推動管治的支柱有幾個，其中廉潔政府是最重要價值，市民一貫相信廉署睇住，對政府管治先有信心，如今次連最高首長特首都捲醜聞卻無向公眾清楚交代，難免令大家擔心整個政府可能會「冧」，非常嚴重，甚至對整個憲制有衝擊。
梁國雄：如曾蔭權話佢自己係政治家，風範應該係以垂典範，但好似佢咁食魚翅、食鮑魚、坐飛機畀錢畀得咁少，應該落台，係佢最後嘅作用，如果唔係佢點貢獻於香港人呢？佢最後嘅用處就係咁喇，無其他架喇。
難自圓其說 立會應彈劾
Q2 立法會應否引用特權法傳召曾蔭權到立法會作供，如果立法會發現曾蔭權無法自圓其說，應否對他展開彈劾程序，要求他下台？
陳偉業：星期三佢嚟唔嚟都好，立法會都可以即時成立委員會進行聆訊同埋調查，等同上次梁展文個案，同可盡快展開。亦可提出一啲無約束力嘅議案，例如○三年我亦喺立法會提過，對董建華不信任動議嘅議案，如所有渠道都無效，最後係進行彈劾。
宋立功：過去幾日曾蔭權都好似「唧牙膏」咁，講啲又唔講啲，我覺得星期三到立法會解畫係重要嘅一步，能夠自圓其說當然恭喜佢啦，如果唔能夠嘅話，我相信立法會應該認真考慮進行彈劾，係好合情合理，亦係保護香港公眾嘅利益。
梁國雄：傳媒的揭發非常重要，立法會當然可以做嘢啦，如果我哋叫佢上嚟，佢都唔上嚟，已經可以彈劾o架喇，係你唔合作吖嘛，可以根據《基本法》彈劾你啦，因為畀咗機會你講你唔講，我哋只可以為市民做嘢，通過彈劾你嚟攞民意。
建制派護短 中央亦坐視
Q3 若曾蔭權漠視民意，拒絕引咎辭職，而立法會又因建制派議員護短而無法通過彈劾動議，令其安全着陸，完成餘下任期。中央政府會否為所謂「大局」着想，大事化小，小事化無？
陳偉業：我覺得我哋好難猜測中共中央嘅調子，但站在本港維權運動嘅立場，香港人呢次應該要企出嚟，我相信比○三年更加激昂，因為○三年係基於廿三條立法同埋連串管治失誤，但呢次係貪污貪腐吖嘛，市民係好着重香港嘅廉潔，呢次我相信上街人數，絕對比○三年多。
宋立功：今年係大選舉年，所有政黨都好提高警惕，要有好高嘅政治敏感度，呢件事發生咗後，建制派政黨都會緊急開中委會，確定黨立場係點，喺呢件事上應對政府採取咩行動，好難避免政黨卸膊或咩都唔做，每日傳媒最新報道同公眾輿論亦會迫使政黨要清晰表態。
梁國雄：今次中共去處理呢件事有一定難度，因為當年董建華○三年七一遊行後，過咗年幾因處理唔到好多問題，咁中央叫佢早抖，佢腳痛，但依家唔可以叫阿曾生頭痛，因佢太過明顯，所以我嘅睇法唔係太樂觀。我都希望中共嘅人考慮，如你支持曾生或曾生背後嘅人的話，你真係要付出代價，呢次可能係一百萬人上街。
誓追究到底 如阿扁收監
Q4 如日後有新證據出現，可否如台灣的陳水扁前總統、菲律賓前總統阿羅若夫人、又或德國前總統武爾夫般，於曾蔭權落台後再追究？
陳偉業：任何公務員貪污，就算借咗五百蚊，都要遭受刑事檢控，但相關條例規管特首嘅部分好奇怪，要證明其所作行為，要對施予利益者有利，方為犯法，於搜證方面極度困難，喺條例不足下，「廉署做唔做到嘢？我自己信心唔大。」
宋立功：曾蔭權事件至今，在深圳租屋事件較易搵到證據，其受賄嘅表證已經成立，廉署無論如何「都要有個說法」。即使曾蔭權下台，透過《立法會（權力及特權）條例》則依然可以繼續對其作出調查，「就算彈劾唔到佢，起碼調查嘅結果都會還歷史一個公道。」
梁國雄：政治人物若肯迎合民意辭職，除非觸犯刑事條例，否則一般不會被繼續調查，「但曾蔭權唔肯！」另外，廉政公署與今次事件有關嘅刑事法例追溯期應為永遠，但其關於特首嘅部分「好奇怪」，恐未能制裁曾蔭權。
特首涉貪污 禍連新政府
Q5 特區之首涉嫌貪污，本港政局會否更加混亂？新一屆行政長官選舉又會否受到影響？
陳偉業：「影響一定好大！」過去本港市民對小圈子選舉，功能組別包庇政府嘅不滿僅屬表面，今次揭發特首貪腐，卻直接凸顯出權力核心「淨係識照顧你嗰啲所謂嘅朋友」，漠視市民嘅困苦，從而激發大眾尋求改革。
宋立功：建議由首席大法官成立獨立委員會，在廉政公署、審計署及申訴專員公署提供意見嘅情況下，聯同法律界人士及立法會議員，檢討《防止賄賂條例》對特首、以至司局長嘅監控機制。
梁國雄：小市民一直感受到官商勾結，但不知道如此不堪。政府與保皇黨一直以「我做嘅嘢可能唔啱，但都係為你好」作藉口，今次卻被踢爆「原來係為自己好」，施政以自己利益為先，道德層面上完全失敗。
姑息爆民憤 港勢陷亂局
Q6 如中央處理未迎民意，會否重現過百萬港人上街抗議？中央是否願意見香港陷亂局？
陳偉業：○三年五十萬人上街由於廿三條立法，以及管治失誤，但今次事涉貪污，港人注重廉潔，（七一）遊行人數絕對會比○三年多，「如果曾蔭權繼續拒絕解釋，或者解釋又係冇理據死撐，我相信民怨民憤係會爆發，千祈唔好低估香港人嘅憤怒！」
宋立功：去年曾蔭權上京述職時，中央已交託要保證新舊政權交接順利，萬無一失，「依家偏偏失喺佢（曾蔭權）嘅手上，都好大劑！」另外，曾蔭權事件會否尚有其他證據曝光仍是未知之數，相信中央會有緊急危機處理，但詳情仍要「睇定啲」。
梁國雄：如保薦曾蔭權者依然在朝中有力，香港人隨時要「食咗隻死貓（動不了曾蔭權）。」不過，假若七月一日遊行人數眾多，則可奠定大局。中央應詳細考慮取態，「支持曾生或曾生背後嘅人，要付出代價，今次可能係一百萬人上街！」
文／圖：專案組