政情：葉劉教英文寸爆唐唐
政務司司長唐英年（唐唐）一句「completely rubbish（完全是垃圾）」，除咗惹起公憤外，亦被人捉到佢英文差。港大英文系一級榮譽畢業嘅立法會議員葉劉淑儀，尋日教班學生哥英文時，就自爆曾經因為批評唐唐英文唔好，被「五毛黨」鬧爆報復，又話唐唐淨係識得「wine and dine」（請食飯），寓意係話「政治唔係請客食飯」。
葉太做校長嘅匯賢智庫學苑搞咗個英文班，尋日壓軸論壇由葉太親自教授。葉太同班後生仔講，唐唐曾經用英文批評過社民連梁國雄喺立法會嘅行為，但係用咗「現在式」，佢覺得應該用「過去式」先至啱，所以佢公開批評過唐唐，點知就有啲「五毛黨」接連寄電郵鬧佢。邊個喺幕後指使，相信大家都諗到。
堂上又有人問葉太「政治唔係請客食飯」嘅英文點講，葉太就話︰「請食飯用wine and dine，唐司長就做緊，佢成日都請人飲靚嘢、食靚嘢，等人支持佢嘅陣營。」真係句句都寸到盡。