政情：煲呔曾踩下屬乞人憎
前日政府公布新一輪高官調動，輿論焦點落喺海關關長連續第五次由政務官空降出任，但對於服務政府長達三十七年嘅李淑儀（Sandra）退休就着墨不多。不過，有人憶起一段有關Sandra嘅往事，踢爆煲呔曾喺香港爆發豬流感期間，懶理港人健康，拒聽Sandra呢位忠僕對防疫措施嘅諫言，自己辭窮之下更發爛渣當眾落對方面，差啲搞到Sandra要劈炮唔撈！
○九年全球爆發人類豬流感疫症，並迅速殺到香港，港府高層多次開會商討對策。據聞喺其中一次會議上，身為食物及衞生局常秘嘅Sandra，根據相關衞生部門同專家嘅專業判斷，提議香港應該設立一個隔離區，以免重蹈當年沙士疫症迅速喺社區擴散嘅覆轍，以保障全港七百多萬市民健康。
不過，唔知煲呔曾係咪擔心此舉會影響香港形象同旅遊業，完全當有關建議係耳邊風，一味話冇咁嘅需要，但係又提唔出任何有力嘅理據。煲呔曾曾經講過，做公務員嘅天職係為市民服務，不惜向上司據理力爭，講出對方唔鍾意聽嘅說話。Sandra本着呢個原則，喺會上繼續力撐設立隔離區，兩人愈拗愈大聲，最後煲呔曾唔夠人講，就語氣極衰咁用英文拋出一句：「你知唔知依家同緊邊個講嘢呀！」當眾落Sandra面。
周一嶽縮骨扮睇唔到
一向硬淨嘅Sandra即場未有畀煲呔曾拋窒，重申佢只係為咗香港市民着想，但據聞Sandra私下對於畀煲呔曾無理羞辱好在意，甚至講到一旦有關對話揚咗出去，佢就會劈炮唔撈！至於Sandra嘅直屬上司、本身係醫生嘅食衞局局長周一嶽，事發時亦在場，但佢全程粒聲都唔出，好似隔岸觀火咁，做上司做到佢咁真係夠晒縮骨。
據悉唔少高官都聽過呢單嘢，大家為Sandra不值同不滿煲呔曾嘅惡行，但為免Sandra難堪先至冇爆出嚟。咁啱得咁蹺，前日公務員事務局局長俞宗怡就喺新聞稿中，特別讚揚Sandra喺對抗豬流感一役「功不可沒」，相信係若有所指。
有高官更指出，Sandra早喺七四年加入政府，○○年已出任當時嘅經濟局局長，到○二年推行問責制後先轉任常秘，絕對有資格更上一層樓。但據聞早排前商務及經濟發展局局長劉吳惠蘭因病辭職時，煲呔曾都冇諗過搵佢頂上，最後寧願揀醜聞多多嘅蘇錦樑，令人質疑煲呔曾忌才兼記仇，衰到冇朋友。