政情：傳內會8‧28提早重開討論防疫工作
政府刊憲撤銷早前中止第六屆立法會會期嘅決定，容許立法會可以按需要盡早恢復運作。有消息指，立法會內務委員會將於本月二十八日舉行會議，討論本港防疫工作。而財務委員會則預料喺九月初重開，審議第三輪防疫抗疫基金。
有消息指出，因應本港疫情持續，政府已經決定推出第三輪防疫抗疫基金，現階段正研究細節並且準備文件，預料喺九月初提交財會審批。據悉，今次財會會議只會審批第三輪防疫基金，唔會審議其他項目。
消息指政府現正向各部門收集意見，由於只係處於討論階段，暫時未決定基金所涉及嘅金額，但有兩大實施方向，包括繼續推行上兩輪嘅措施同作補漏拾遺。
10‧14將發表施政報告
內會副主席馬逢國表示，喺正常情況下，政務司司長張建宗會出席會議，但未知會唔會連同其他官員出席。馬逢國話內會未定會議議程，但預料到時會討論全民檢測計劃、第三輪防疫抗疫基金、禁聚令、健康碼等抗疫議題。
特首林鄭月娥又宣布，將會喺十月十四日發表施政報告，由於疫情嚴峻同社交距離限制，今年施政報告諮詢會將以十二場視像會議形式進行。