中環出更：移民潮流失人才 梁天富冇有怕
近排聽到好多人話想移民，亦有數據顯示有關移民嘅查詢人數急增，有獵頭公司表示擔心移民潮導致香港人才流失，分分鐘資深員工走咗請唔番合適人才頂替，做老闆嘅都咪話唔頭痕，但香港善德基金會副主席梁天富（Eddie）就話冇有怕喎。
早前卓妮喺馬場撞見Eddie，講開香港或再現移民潮，佢就話冇聽到身邊朋友想走喇，至於人才流失嘅煩惱都唔關佢事。Eddie話對同事最緊要用心同尊重，員工做得開心放心就自然唔想走。
蔡黃玲玲：做得開心點會想走
Eddie一直以「無為而治」去管理公司，唔干預同事做嘢，等佢哋自我發揮，但同時會關心同事以至佢哋家人喺生活上面對嘅問題，因為家庭生活問題都有機會影響同事嘅工作心情，所以佢每年都會請晒全公司同埋佢哋屋企人去旅行開心吓，一來有機會同佢哋傾吓偈，了解吓生活上面對嘅問題睇吓有冇嘢幫到手，二來員工同家人感受到公司嘅關心自然就產生安全感，咁個老公喺出面拚搏加班，老婆亦理解老公係為公司做夜啲而唔係走去玩啦！
仁愛堂前主席蔡黃玲玲都有入場，從事投資行業嘅佢都認同工作環境互相尊重以禮相待，大家都做得開心又點會想走喎，佢話一向當同事係家人咁看待，大部分同事都做咗好多年，最短嗰個都超過廿年。蔡太話明白受社會亂象加上疫情影響，令到有人會失信心而選擇離開香港，但佢就叫大家唔使太擔心嘅，話其實到依家都仲有好多公司嚟香港上市，證明香港依然都係經濟強勁嘅地方。
轉頭見到九龍樂善堂當年委員陳達華，佢都有留意相關報道，知道有港人選擇做投資移民。佢話做生意當然係想盤生意愈做愈大嘅，除非你係做一門當地冇嘅生意，否則就要同當地已有嘅地頭龍競爭，在商言商，與其係咁倒不如考慮吓投資大灣區，起碼商機處處唔使爭崩頭啦！
卓妮