香港美食天堂呢個朵果然唔係浪得虛名，珍饈百味應有盡有。呢嗱，好似「骨灰魚」呢一道獨特菜式，好多人肯定未聽過！
各位唔好以為功夫茶講笑，係真有其事㗎！話說本港公營骨灰龕位長期供不應求，近幾年食環署大力推廣海葬服務，由於反應唔錯，食環署今年初開始安排免費渡船，接載市民到指定海域撒放先人骨灰。聽落好似好便民，弊在當局監管不力，有啲海葬船冇依足規定，未到指定海域就亂撒骨灰，你話係咪靠害吖。
本報記者早前坐船追訪整個海葬過程，發現船隻去到東龍洲西南面鹿頸灣嘅沙灘對出，就將骨灰撒落海面。記者查過海圖，進行儀式嘅位置同東龍洲東面嘅指定海葬點仲有一大段距離，咁都得？有海洋專家指出，嗰度鄰近養殖魚排，喺風向同潮汐配合下，骨灰好有機會漂向魚排同沙灘；漁民團體就反映，試過有人喺魚排附近做海葬儀式，萬一啲魚食咗骨灰，都唔知點算好。你話嘞，魚食骨灰人食魚，咁仲唔係聞所未聞、見所未見嘅「骨灰魚」？
聽吓食環署點樣解釋吖。佢哋話喎，署方每次都會派職員隨船出海，監察整個海葬過程，又強調只有遇上大浪日子，喺乘客安全大前提下，至會將船駛到風浪較細嘅指定海域旁進行儀式。其實，呢啲不過係狡辯啫，正如有漁民團體話齋，食環署帶頭違規，如果其他人有樣學樣，豈不是亂晒龍？
食環署咁搞法，先唔講市民分分鐘食到骨灰魚，最重要係唔尊重先人。海葬嘅原意之一係讓先人可以回歸大自然，係一項莊嚴嘅儀式，點可以求求其其將骨灰撒喺近岸海邊㗎！
查實，之所以愈嚟愈多市民接受海葬等另類殮葬方式，都係因為公營骨灰龕位長期爭崩頭。家陣有幾萬宗輪候政府骨灰龕位個案，輪候時間仲長過申請公屋，市民無奈之下惟有接受海葬安排。點知當局無監無管，海葬原來咁兒戲，見到都怕怕啦，仲邊有人敢做不孝子孫呢？
講到尾，最無奈都係小市民，先人冇「公屋」住，想入住「私樓」又如何？唔好意思，當局根本冇發牌制度去規管，搞到非法經營嘅私營骨灰龕堂遍地開花，梗有一間喺左近，農地啦、工廈啦、唐樓啦、長生店啦，甚至銀行保險箱啦，你諗得出嘅地方有，你諗唔出嘅地方亦有。莫講話消費者冇保障，骨灰龕鄰近民居，少不免造成滋擾，隨時引發衝突。唉，今時今日，小市民在生唔可以安居樂業，死後又冇葬身之地，你話係咪無奈呀！
老實講呀，要防止海葬船亂撒骨灰一啲都唔難，正如有立法會議員建議，只要喺海葬船上安裝全球定位系統，全程監察咪得囉。可惜，就算點樣簡單，落到港府官僚手上，唔研究十年八年都冇可能成事。一句講晒，食環署靠害，香港人遲早連魚都唔敢食。