有人話「睇醫生」嘅講法怪怪地，咁又係嘅，明明係醫生睇病人，變咗病人睇醫生，確實有啲怪。不過咁，香港地幾怪都有，病人唔止要睇醫生，仲要金睛火眼實醫生，如果唔係，隨時好大鑊㗎！
唔係嚇你，咁講一啲都唔誇張，家陣無論公立醫院定私家醫院，醫護人員做嘢經常好似失魂魚咁，斷錯症、開錯藥、割錯器官，甚至連孕婦肚入面嘅ＢＢ都搞到冇埋，千奇百怪乜都有，梗係要睇實啲啦。
呢嗱，林太早排因尿道炎及下體有啡色分泌物，去荃灣港安醫院求診，醫生「確診」佢冇懷孕，開咗止血藥。幾個禮拜之後林太去睇婦產科，發現原來已經懷孕三個月，但因為曾服用多種藥物同照過Ｘ光，林太擔心會影響胎兒發育，無奈之下惟有落咗個ＢＢ。
做過化驗Check過晒，居然有孕當無孕，唔通醫生鬼眼？雖然醫生事後道歉兼承認疏忽，但就解釋話，化驗報告字體太細，睇唔到林太已經懷孕喎。一句疏忽睇漏眼，一條無辜小生命就咁被扼殺，你話係咪悲劇吖。
醫者父母心，如果醫生冇責任心，當局又唔監唔管，就算化驗報告啲字寫到雞乸咁大隻，或者醫生用放大鏡睇，都係嘥氣。衞生署數字顯示，今年頭三個月已經接獲五宗私家醫院呈報嘅事故。有民間監察組織直斥衞生署監管不力，淨係靠私家醫院自我規管，導致近期私院頻頻爆發事故。
睇嚟，需要用放大鏡睇報告嘅唔止醫生，仲有漠視病人利益嘅醫療衞生高官。其實，除咗私家醫院屢爆醜聞之外，公立醫院更得人驚，唔止管理立立亂，出錯當食生菜，而且鑊鑊新鮮鑊鑊甘。
話口未完，伊利沙伯醫院又出事嘞。一位老婆婆月初因為心臟有事入院，當時血糖水平正常，四日之後醫生見婆婆神情呆滯，檢查發現血糖嚴重偏低，化驗顯示尿液含有控制血糖嘅代謝物，懷疑又係醫護人員派錯糖尿藥所致。當局話喎，相關調查報告要六個禮拜先完成。唉，又係呢招！
話時話，家陣做香港人，求神拜佛身體千祈唔好出事，否則，隨時畀人玩死。嗱，去公立醫院睇病，閒閒地輪候幾粒鐘，見醫生只得幾分鐘，正一得個「睇」字，唔好彩嘅整劑配錯藥、開錯刀、輸錯血，咁就唔死一身潺。就算畀得起錢去私家醫院，情況亦唔好得去邊，一樣係提心吊膽。
煲呔曾吹水唔抹嘴，將醫療產業列為「六大優勢產業」之一，簡直不知所謂。本港醫療服務無論私營定公營都搞到一鑊泡，大家亂鬥亂，港人睇病要搵命博，仲想搵外人做白老鼠，發夢都冇咁早啦！